Вай гьатрай хьунни цIуну дузал бувсса Республикалул 2-мур клиaникалул азарханалул хъунама хIакин Ибрагьим МахIаммадовлул пресс-конференция.
ХIасан Аьдилов
Муний 2-мур РКБ-лул хъунама хIакиннал бувсунни му азархана республикалул ветерантурал азарханалул гьанулий дузал баврил хIакъираву. Мунал тIимунийну, республикалий ялапар хъанай бур сайки 140 азараксса хъунив хьусса инсантал, миннан дур 60-нния лирчусса шинну – миннавух бур Хъун дяъвилул ветерантал, личIи-личIисса дяъвилул иширттал ва захIматрал ветерантал, миннан цинявннан медициналул кумаг буван аьркинссар цIуну бувсса 2-мур РКБ-лул.
Яла хъунама хIакиннал бувсунни 2-мур РКБ дузал баврил мурадрая: «Республикалул медициналул центрданий бивкIссар 3 личIи-личIисса медициналул учреждение – поликлиника, ветерантурал азархана (госпиталь ветеранов) ва гериотриялул центр. Миннул гьарцаннул ивкIссар хъунама хIакин, хъиривчутал, миннал каялувшиву дуллай ивкIссар Медцентрданул хъунама. Ми шамунния утти ца бувссар мюнпат ххишала хьуншиврул, харжлугъ чан даншиврул», — увкунни Ибрагьим МахIаммадовлул.
Мунал бувсунни мукунма цукунсса отделенияртту зий буссарив 2-мур РКБ-лий, цукунсса азарду ва цIунцIияртту хъин дуллай буссарив. Масалдаран, «Демография» тIисса нацпроект дузрайн дуккан даврил лагрулий ва азарханалий тIивтIуну бур хъунив хьуминнансса гериотриялул отделение.
