Халкьуннал, щиядунугу цIа дан ччисса чIумал: «Та ненттабакI тIивтIусса инсанни», — учай. Бунияла, мукун ненттабакI тIивтIусса инсан бур Ваччав яхъанай, цуппагу Хъундяъвилул гьурттучи Муслимов Юнуслул щащар Нурижат.

Ва цуппа 1-мур ЦIувкIратусса бур.Ва хъамитайпалул гьарца шинал Хъун дяъвилий Ххувшаву ларсъсса кьинилул хьхьичI цила лас дакIнийн утаврин хас бувсса мажлис-ссупра тIитIай. Гьашинугу хьунни мукунсса мажлис.

НурижатлучIан му кьини бувкIун бия: райондалул библиотекарттал каялувчи ХIажиаьлиева ПатIимат, биб­лиотекалул зузалт — Мустапаева СалихIат, Аьлиева Шавлухъ, Исакьова Аьйшат, культуралул зузалт -Суллуев Муслим, МахIаллиев МахIаммад, Юнуслул даврил уртакь Аьбдуллаев Арсен, ЧIяйннал культуралул къатлул хъунмур Алхасова СалихIат, Ваччиял шяраваллил администрациялул бакIчинал хъиривма Мадаева Роза, чIаххул ва гъан-маччами.

Мажлис бачин бувну ия Нурижатлул хьхьичIунсса хъамаличу, Щардал шяравасса ХIусманов Амир.
Нурижатлун, ванил ласнан Юнуслун хас бувсса балайрду увкуна Суллуев Муслимлул, Аьлие­ва Шавлухълул, Алхасова СалихIатлул, Нурижатлул ссил Зумрутлул. Назмурду дурккуна Аьбдуллаев Арсеннул. Хьуна цайми-цайми барча бавурттугу, балайрду учавугу, къавтIавурттугу. ЦIуллу баннав ина, Нурижат!