[dropcap]И[/dropcap]юнь зурул 1-нний Къазахсттаннал Нур-Султан шагьрулий (нукIувасса Астана) хьунни Къазахсттаннаясса, ОьзбакIнавасса,Белоруснавасса ва Аьрасатнал билаятирттаясса 1000-ннийн бивсса оьрчIру гьуртту хьусса Евразиянал интеллектуал ментал арифметикалул олимпиада.

---

Имара Саидова
[dropcap]О[/dropcap]лимпиадалул сакиншинначитал хьунни «ЮСИМАС» тIисса дунияллул халкьуннал академия. Ва олимпиадалий цалчинсса кIану бувгьунни ва дунияллул рекорд кка­ккан дунни «Сафинат» школалул 7 «б» классраву дуклаки­сса Штанчаев Амир Муслимлул оьрчIал. «ЮСИМАС» тIисса ментал арифметикалул школалий хIадур хъанахъисса шинал лажиндарай Амирдул цимилгу бюхттул дунни цува дуклакисса школалул цIа.

[dropcap]Ш[/dropcap]танчаев Амир ур дунияллийх аьлимтурайнугу машгьур хьусса ГьунчIукьатIрал шяравасса.
ДакIнийн бутанну Амирдул ментал арифметикалул чемпионатирттай уттинингу ххувшавуртту ларсун диркIшиву. Компьютердал даражалий бакIраву математика дуллалисса оьрчI мяйжаннугу итххявхсса ур. Амир оьрмулул 12 шинаву айивхьуну ур хасъсса программа лахьлахьисса «UCMAS» тIисса ментал арифметикалул школалийн занай. Ванал, республикалул чемпионатирттай гьуртту хьуну, хьхьичIунсса кIанттурду бувгьуссия. 2018 шинал Грознай шагьрулий хьусса Ухссавнил Ккавкказуллал Федерал округ­рал чемпионатрай Амирдул бувгьуссия 3-мур кIану.

Гьашинусса шингу чIава генийнацIун хъинну даркьусса хьунни. Цал Москавлив, яла Железноводс­калий хьусса СКФО-лул чемпионатирттайгу Амирдун ментал арифметикалул лаваймур даражалул сертификат дуллу­ссия. Вай чемпионатирттайгу Амирдуща, цаярва оьрмулул хъунисса ва практика дусса оьрчIал дянив бястлий увккун, куртIсса кIулшиву кка­ккан дан бювхъунни.

— ЧIяру числорду дусса хIи­савртту минутIирттал лахI­залий даву – му бигьасса иш бакъар. Укунсса хIисавртту дуллали­сса оьрчIал ня хъинну щурущи­сса дикIан багьлай бур. ЮСИМАС школалийсса программалул, оьрчIан ментал арифметика лахьхьин даву бакъассагу, итххяххан байссар оьрчIал интеллект. На дакIнихтуну барчаллагьрай ура нава чемпионатир­ттайн хIадур уллай хъунма­сса захIмат бивхьусса ттула учительтурайн, — тIий ур Амир.

Уттигу Амир, Аьрасатнал цачIундур командалувух, гьур­тту хьунтIиссар кIинттул Камбоджанаву дикIантIисса ментал арифметикалул дунияллул халкьуннал дянивсса олимпиадалийгу. ЧIа учинну Амирдун вай бяст-ччаллавугу цала гьунар ккаккан бансса тIайлабацIу!