Учитель. Ттун ва мукъуцIун бавхIусса ца махъ ялагу хъинну ххуй бизай. Дарбантуллал даралуву, хIурмат бан ччи­сса инсан хьунаавкьуни, ганал цIанил ялун ххи бай «муаьллим» тIисса махъ.

Жунма кIулли вай кIивагу махъ ца инсаннайн учайшиву. Му инсангу хъанахъиссар, чIивиманая айивхьуну, хъунаманангу дунияллул тIитIаларттая, тарихрая бусласисса инсанну. Мунайнну жува Учитель, Му­аьллим тIиссагу.

Цаппара шиннардил хьхьичI на, Ххувшаврил кьинилун хас дурсса, оьрчIал чирчусса сочиненияртту цачIун дуллай уссияв «Илчи» кказитрай рищун. Мукун Ккуллал 1-мур школалийн лавгун унува, кIикку на кIул хьуссияв лакку мазрал ва литературалул дарсирал муаьллим ХIусайнова Уммугьалият Абакардул душнищал. Дурусну навагу тIайла авцIунав дарсирайн занг рирщусса лахIзалийн. Ихтияргу ларсун, нагу щяивкIссияв Уммугьалиятлул дарсирах вичIи дишин. Га ца дарсиралгума бувсуна ттухь цилла даву кIанийн дуртун дувайсса, цилва пиша ххирасса инсан бушиву Уммугьалият.
Гьай-гьай, хьуна яла жул дянив чIиви-хъунсса ихтилатгу.

[pullquote]Уммугьалиятлул классрал оьрчIал чирчусса сочиненияр­тту «Илчи» кказитрайгу рирщу­ссар.[/pullquote]

— На бувссара Ккуллал шяраву 1947-ку шинал. Ттул ни­ттийн Муслимат, буттайн Абакар учайссия. Школалий дуклакисса шиннардийра ттун учительнал касму ххуй дизлан диркIуна. Учитель икIайва цинявннал янилусса инсан. Мяйва класс къуртал байхту, дуклан бувхссияв Буйнакскаллал 1-мур педучилищалийн. Муния махъ бувккуссар Дагъусттаннал институтрал биологиялул факультетгу. Амма на яла ниттил мазрал ва литературалул дарсирдал учительну зун­сса специализация бартдиргьу­ссия. Гана га институт къуртал бувсса 1974-ку шиная шинмай зийгу бура лакку мазрал ва литературалул учительну…
МукьцIаллий ххюра шинай оьрчIахь дарс дихьлай бикIаву ваца къамукссава хъунмасса зат кунма буслай бур ва цуппа. Амма му мукун бакъашиву жунма ххуйну кIулссар.

Уммугьалиятлул учениктал цимилгу гьуртту хьуну бур райондалул ва республикалул олимпиадарттай, ларсун дур ххувшавурттугу. Цуппа гьур­тту хьуну бур ниттил мазрал учительтурал дянивсса конкурсир­ттай, бувгьуну бур хьхьичIунсса кIанттурду.
На ялув кIицI дурсса, Уммугьалиятлул классрал оьрчIал чирчусса, сочиненияртту «Илчи» кказитрайгу рирщу­ссар. Хъинну дакIний личIанну чирчу­сса дия.

Ванин цимилгу дуллуну дур грамотартту, дипломру, барчаллагьрал чагъарду. 2006-ку шинал Уммугьалият лайкь хьуну бур «Почетный работник общего образования Российской Федерации» тIисса хIурматрал цIанин.
ХIакьинугу Уммугьалият зийнма бур, цила дакIнил гъилишиву ва кIулшиву оьрчIайх кIидачIлай.
ЦIуллушиву дулуннав ви­хьхьун, Уммугьали Абакаровнай!

Шиккува кIицI ан ччива ванил ласгу, аьпа биву, Мирзагу. На Ккуллал райондалий «Илчи» кказитрал корреспондентну зун увкIсса 2013-ку шинал бакIрайн агьуна ттун Мирза. Мирза Ва­ччату Хъусрахьхьун тихунай ва шихунай инсантал бувцуну занай икIайва «Газель» машиналий. Хъярчий­сса, дусшиву дуван хьхьичIунсса ккуличу икIайва. Нагу, вай кIицI дурсса кIира шяравун акъагу, цайми шяраваллавунгу цимилгу ванал иян ув­ссара, бувсса хIурматгу дакIния къалагай.

ХIажимурад ХIусайнов