[dropcap]И[/dropcap]юнь зурул 14-нний, террористуран арцуйнусса кумаг буллай ивкIшиврийн щак тIий, увгьуну ивкIсса «Черновик» кказитрал журналист Аьвдулмуъмин ХIажиев кIива зуруйссадуснакь увну итан хIукму бунни МахIачкъалаллал Советский райондалул судрал судья ТIалхIат ХIажиевлул.
А. Аьбдуллаева
Аьвдулмуъмин ХIажиевлул хIакъираву АьФ-лул УК-рал 205.2 ва 205.4 статьярдайн бувну уголов дело сукку дурну дур. Ванащал архIал бувгьуну бур Дагъусттаннаясса Абубакар Ризванов ва Къабардин-Балкьарнавасса Кемал Тамбиев (ва Москавлив увгьуну ур).
Аьвдулмуъмин ХIажиевлун танмихI буллалисса судрал процессрайн журналистал къабивтунни, хьхьичIмур судрал батIаву, «Черновик» кказитрал закондалуцIун къабавкьуну, суратру ва видеоматериаллугу рирщуну аьлтту дурну диркIун тIий.
Цахьхьунма махъ буллувкун, ХIажиевлул бувсунни цайва тахсир бакъашиву, цал экстремистуращал ва террористуращал дахIаву душиву тасттикь буллалисса хIучча бакъашиву, къия дурсса Кемал Тамбиевлул бувсмур бакъасса.
— На ттула пикрирду кьюлтI къабувну соцсетирдаву бищара.
На кIулсса цаягу инсан вих къахьунтIиссар, на террористуран кумаг буллай ивкIссар тIий, — увкунни А. ХIажиевлул ва тавакъю бунни цува дуснакьрава итаакьияра куну.
Аьвдулмуъминнул адвокатътурал дуллунни судрайн чIахху-чIарахнал ваная ххуйсса тIутIисса 26 характеристика ва терроризмалийн къаршисса пикрирду бусса ванал макьалартту.
Судрал хIукму бувну махъ хьусса пресс-конференциялий А. ХIажиевлул адвокатътурал бувсунни ванан бувсса танмихIрай цивппа къарязишиву. Хъирив кьини ПрезидентначIасса Инсаннал ихтиярду дуруччаврил советрал хъунама Михаил Федотовлул баян бунни журналистнал хIакъиравусса уголов дело тIайлану ххал дигьаврил ялув ацIантIишиву.
