[dropcap]З[/dropcap]умаритавал, Эдрал кьини – хъинну ххирасса кьинир. ХIатта, Аллагьу Тааьланал Алжан му кьинир тIар ляхъан бувсса, Алжаннавусса яла хъунмур мурхь му кьинир тIар бивщусса. Жабраил малаик вахIишиврий ихтияр увсса кьинир тIар.

Му кьинир тIар Алжан ляхъан бувсса

[dropcap]М[/dropcap]унивусса пасилартту, хъиншивуртту чIяруссар. Дуаьлу­хьхьун жаваб дулайсса, бунагьру шюшайсса, Аллагь цIимилийну ургайсса кьинир тIар. Му хьхьуну, баргъ лавгун махъ, Эдрал чак булланнин, кIичIирттаву, мизитирттаву, къатраву, чув бухьурчагу, такбирду бишавугу суннатссар тIар. Му хьхьу уттара давугу хъинссар тIар, тIааьт-эбадат дуллай, Кьуръан буклай, зикри-ссалават ккалай.

Щалла хьхьу мукун гьан дан къабюхъайманал мунил хъунмур чIун эбадатрай гьан дувача. Мугу къабюхъайманал, ца ссятгу дурну, хъатIан чак ва кIюрххил чак жамааьтрай бан хIарачат бувача. Эдрал кьини чак баннин мукьттуршва «Ла илагьа илла ллагьу вахIдагьу ля шарика лагьу, лагьул мулку, ва лагьул-хIамду юхIъи ва юмиту ва гьува аьла кулли шайнин къадир» учирча, мукьттуршва бакI тархъан бивтссаксса чиригу, цайми даражарттугу буссар тIар.

[dropcap]Э[/dropcap]драл хьхьу дуркIукун, ливтIусса муъминтурал рухIру ссаврунная лухччинийн лир­ккун, цалла къатрал лагмара кку­ранну дурну, оьвтIун ди­кIайссар тIар, инсантуран къабаярчагу: «Жугу, зу кунма, дунияллий вай къатрал, ми хъуслил заллухъруну бивкIссару: жухлуну цадакьагу бувара, жул гьаттайн зияратрайгу булухьхьияра, жунгу жува бувсса хъинсса аьмал бакъа къалявкъунни», — тIун дикIайссар тIар. КIюрххил яла цалла кIанайн кIура даяй­ссар тIар.
Му кьини ливтIуминнал гьа­ттайн бивну, миннаяту цадакьагу бувну, ххуйсса яннагу ларххун, ххуйсса хIалалсса дукрагу дурну, кувнначIан кув зияратрай лавгун, хIалалшиву ласаву хъин­ссар, суннатссар тIар. Аллагьнал тавпикь дулуннав!