Дус-ихтивартурал ккурандалул дянив

[dropcap]И[/dropcap]юньдалул 7-нний Дагъусттаннал Поэзиялул театрданул директорнал хъиривчу, ДР-лул лайкь хьусса культуралул зузала Супиян Оьмаровлул60 шинал юбилей барча дуван «Арулчинмур континентравун» бавтIун бия ванал пишалул уртакьтал, дус­тал, гьалмахтал.

П. Рамазанова
1-мур ЦIувкIратусса Супиян къакIулсса лакраву чансса бакъа бакъахьунссар: цIанихсса тямада, балайчи, шаэр, музыкант. Супиян барча уван бувкIминнавух бия Поэзиялул театрданул директор Елена Гьарунова, «Дагестан» РГВК-лул хъунмур Елена ТIагьирова, Опералул ва балетрал театрданул директор МахIаммад Абасов ва цаймигу творчествалул инсантал, интеллигенция.
Культуралул министрнал хъиривчу ХIажиев Мурадлул ва Поэзиялул театрданул директорнал хъиривчу Ариза Батыровал юбилярнан дуллуна «Поэзиялул театр» тIисса арцул лишангу, Аьрасатнал Культуралул министерствалул чулухасса ХIурматрал грамотагу.

Мукунна, ХIурматрал грамотагу дуллуну, юбиляр барча увна ЦIувкIуллал Жяматийсса совет­рал чулухагу. Комсомол активистътурал чулуха барча увна профсоюзрал рескомрал председатель АьбдурахIман Адамовлул, халкьуннал шаэртал Сибирбаг Кьасумовлул ва Космина Исрапиловал.

Юбиляр барча ан бувкIун бия Мариян Илиясовал цIанийсса «Дараччи» фондрал хъунмур Гульшан Хасаева хьхьичIну «Дараччилул» душру.
Супияннул кьини хъун дурна лакрал машгьурсса балайчитурал: Загьидат Муслимовал, Гьажар Рамазановал, Рашид Багатаевлул ва Зарипат Ванатиевал. Мандолинагу бивщуну, балай увкуна Супияннул цалагу, мунацIун бавхIуна ссу Эльмиралгу.

Цалла кьини хъун дуван бавтIцириннахь барчаллагь тIий, Супияннул увкуна: «На хIакьину ттуятувасса ххуй-ххуйсса махъру аванс хIисаврай кьамул буллай ура, ттун утти кIулли дурцири цIарду хIалал дуван нава цукун къуццу тIун аьркинссарав, хъиривлахъу буллантIиссара».