Мармарчария бувну бацIан бунни Щаза

Мармарчария бувну бацIан бунни Щаза

Мубараксса Рамазан зурул гьантрай Ккурклив дакI ххари дансса ца ххаллилсса давугу хьунни. ЦIанихсса шаэр, чичу, балайчи Ккурккуллал Щазан дацIан дунни ххаллилсса лухIи мармарчарил гьайкал.

Хъунмасса захIмат бивхьунни Ккурккуллал жяматрал ва даву чIирисса чIумул дянив бакIуйн дуккан дан. Укун буслай ур ва даврил сиптачину хъанахъисса, миннавасса ца Даниял Магьдиев:
— Ттун чIявуну дакIнийн багьлан бикIай шяраваллил тарихрая, хьхьичIазаманнул оьрмулуцIун бавхIусса иширттая ттухьва оьрмулул хъуниминнал бувсмур.

Ми иширттая бюхханну бусайва Пагьабутта ХIажиевлул, Пятали Аьбдуллаевлул, Аьвдуссалам Магьдиевлул, Кьадинахъал МахIаммадлул ва Рамазаннул. Вай инсантурал бусласимуних вичIи дирхьусса чIумал, ттун ттула буттал шяраваллия ва щарнил жяматрая пахру багьайва. Ккурккуллал шяраву таний шеърирду, шаммарду чичайсса хъами чан­сса къабивкIун бур. Ккурккуллал Щазал цIа ялу-ялун бюхттул хъанахъисса дур, зумату щяв къадихьлахьи­сса дур. Амма буттал шяраву­сса мунил гьаттайсса кIалабарз Щазал цIанин лайкьсса ба­къашиву ялунма чIалачIисса зат бия. Щазал гьав Щазан лайкьну дакъая. Цаппара шиннардил хьхьичI Ккурклив хьунни Щазал фестиваль. Нигь дия, ванил гьаттайн биянну къаучайссания щилчIав тIисса.
Хъунмасса барчаллагь учин ччай ура мукъуйну, канийну ва даврил чIарав бавцIусса цинявн­нахь. ХIакьинусса кьинигу, лагма-ялттусса кIану лазилакьи буллай, лирчIми давуртту дуллай зузисса Заур Аьбдуллаевлухь. Хаснува кIицI лаган ччай ура Магьдиев Аьвдуссаланнул, ХIажиев Багъданнул, ХIажиев Багъирдул, Сурхайл арс Дибиров Мурадлул, Ангелинал цIарду. Щазал гьайкал дацIан дуллалисса бавну, арцуйнусса кумаг бунни Щазал гъан­сса душ бувцусса Ваччатусса Сяидлул. Хъунмасса барчаллагь баян бунни циняв гъанчунал цIания Щазал ссил душнил душ Раисатлул. Москавлия оьвкунни Щазал арснал душнил Наидал, — рязину буслай ия Даниял.
Утти Ккурккуллал хIа­тта­лливсса Щазал гьав дуссар Щазан лайкьсса.

Читайте также: