[dropcap]И[/dropcap]юньдалул 9-нний Дагъусттаннайн бувкIунни Ленинградуллал улклул Законодател Мажлисрал депутатътурал делегация, мунил бакIчину ур парламентрал председатель Сергей Бабенин.
Хъиривмур кьини Дагъусттаннал ХIукуматрал Къатраву хъамаллуращал хьунаавкьунни Дагъусттаннал парламентрал спикер Хизри Шихсяидов.
Мунал хъамаллурахь бувсунни Дагъусттанная, экономикалул бюхъурдая ва инвестициярттал каширдая, гьавалул ва климатрал шартIирдая, агьалиная. Дагъусттаннал парламентрал спикернал тIимунийну, республикалул бюджет бур 123 млрд. къурушрал, циллами доходру дур 26 млрд. къурушрал.
Мунияту Дагъусттаннан хайр хьунссия Ленинградуллал улклуясса даврил уртакьтурал давурттая хавар ласурча, кутIасса чIумуй миннал му ххуллий дурсса давурттал хьхьичIуннайшивурттугу хIисавравун ларсун. Хизри Шихсяидовлул бувсунни мукунма республикалул парламентрал давурттая.
Яла махъ лавхъунни Сергей Бабениннул. Мунал бувсунни Ленинградуллал улклуй 14 азара дагъусттанлув зий ушиву.
Сергей Бабениннул тIимунийну, улклуй зий бур чIявусса предприятияртту, ми дузал бувну бур чил билаятирттая бувкIминнал. Заксобраниялий зий ур 50 инсан, миннавату 28 ур мудана зузисса.
Хьунабакьаврий ххал бивгьунни цаппара агьамсса масъалартту, миннувух – личIи-личIисса даражардал бувчIавуртталссагу, экономика лядуккан даврил ххуллурдалссагу.
Хъиривмур кьини хъамал лавгунни Дарбантлив.
