Рамазаннул арс Рамазанов МахIаммад-Рамазан
Май зурул 8-нний ахиратрал хьунни Аьвдухъал тухумраясса Рамазаннул арс Рамазанов МахIаммад-Рамазан.
МахIаммад-Рамазан увну ур 1925-кусса шинал ЧIяйннал шяраву Рамазаннул ва Султанавл кулпатраву.
1942-ку шинал къуртал бувну бур ЧIяйннал дянивмур даражалул школа. Учительтал дяъвилийн лавгун, цаппарасса учениктуращал МахIаммад-Рамазангу, школа къуртал байхту, дарсру дихьлай ивкIун ур Ккуллал райондалул школарттай. КIиягу хъуними уссурвал, МахIаммад ва АбутIалиб, дяъвилий буну, МахIаммад-Рамазан нитти-буттал чул бищуну, кумагчину ивкIун ур.
1946 шинал увххун Ташкантлив юридический институтравун, гагу къуртал бувну, 1950-ку шинал зун ивкIун ур Дагъусттаннал прокуратуралий.
Зий ивкIун ур личIи-личIисса давурттай – Лакрал ва Ккуллал районнал прокуратуралий, МахIачкъалаллал прокуратуралий следовательну. Прокуратуралул давурттай зий дурну дур 17 шин. Муния махъ личIи-личIисса идарарттай юрисконсультну зий ивкIссар 2006-ку шинайн ияннин. МахIаммад-Рамазаннул захIматрал стажрал хъанай дур 65 шин.
Ванал такIуй чIу гьаз къабайва, ва ия лагма-ялттунащал авкьуну, шайнан шайсса кумаг бувну, оьрму бувтсса инсан.
МахIаммад-Рамазан ахиратрал шаврил кьурчIишиву кIидачIлай буру ванал душваврахь, гъан-маччанахь, дустурахь. Ванал оьрмулийн къаивну цучIав ахиратрахьхьун къагьаннав. Ваналгу бунагьирттал аьпа баннав, гьав нурданул дуцIиннав.
ЧIяйннал жямат
чувшиврул лишан
Ссунгъуров Суллал аьпалун
ОьрчIнийва уссияв
ина кьянкьасса,
Зунттал аслан куна,
дакIнил зирангсса.
Жагьилтурал дянив
ияв сий ххисса.
Вил лагма лагайва
лакрал къучагътал.
Вихь кумаг чIа учин
цу учIарчагу,
Къаучайва ина
къахьунссар куну.
Аслансса дакIнищал
ачайвав ина,
Винмагу къакIулна
щихлу найссарив.
Буккайва кув
чIумал бучIибакъултгу,
Нигьа усан ан ччай,
вийн гьужум буллай.
Къашайвав миннаща
ина лахIан ан,
Нигьа усан увну,
вивун ццах бутан.
Вийн данди ацIансса
гьутру бакъанал
ТIайлагу бувккуна
лавмартсса ккулла:
ХIура бан къашайсса
чIутIул закантту
Гъагъан бан бувуна
чIутIул ккуллалух.
Оьнугу, хъиннугу,
оьрмугу лагай,
Ххаллилсса чувналгу
гьаттай кавс ххяххай.
Шин цими гьарчагу,
ци лиярчагу,
Суллай, вил чувшиврул
лишан абадссар.
Салман Исмяилов,
ш.Гьуйми
Аьзизсса ниттил
аьпалун
Ттул аьзизсса нинуй,
Ттул ляълу-жавгьар,
ХхюцIалла шин хьунни
Ина дакъану.
Амма чIарав дакъа
ЧIунну найнугу,
ДакIнияту тачIав
Тиннай къашара.
Цавуна хъювхъу тIий
Ппугу кьаивтун.
Мукьай лажинт шюшлай
Жугу кьабивтун,
Ххувзаннал цачIанна
Ина ларсунав.
Вищал дачIра хьуна
Щалла ичIалу.
ДахIалай учинсса
Чинарданул чурх
Чув бивхьуну бурвав
Ахир-Миналий?
Шиннугу ларгунни,
Ца гьантта кунна,
Ттул дакIрив дур ттигу
Вих ялугьлайнна…
Бахттун Гъазиева,
ш. ЧукIун
