ДукIусса шинал, мадара хIа­ллай къашавайгу хьуну, дунияллия лавгуна Цалчинмур ЦIувкIратусса Рамазаннул арс ХIандайхъал Закир.

Закирдун ца шин хьусса чIумал, ппу лавгун ур Хъунма­сса Буттал кIанттул цIанийсса дяъвилийн. Дяъви къуртал хьуну махъ, ятIа-тIар бакъа акъа хьу­ссар тIий, лякъин къавхьуну ур.
1-мур ЦIувкIрав, яла ЧIяв школагу бувккуну, армиягу лавхъун, махъ заочнайну шяраваллил хозяйствалул институтравугу дуклай, Закир зий ивкIун ур личIи-личIисса давурттай МахIачкъалалив. Телевидение зун дайдирхьусса чIумал, му зун увххун ур миккун операторну. Махъ ппурттуву суратру ришлай уссия, пенсиялийн укканнин.

1990-ку шиннардий мунан пишкаш бувну бия «Вахта памяти» тIисса лу. Микку мунан лявкъуну бия цала буттаясса чIивисса информация, ппу дяъвилий щавурду дирну ивкIусса ва Алпатово тIисса шяраву Чачаннаву увччуну усса.
Июль зуруй, Закир увччуну мукьцIал лахъаннин, на икьрал дурссия ванал арс Рамазаннущал цала буттал ппу увччусса кIанайн гьан ва гьав лякъин.
Карталий ххал бувсса чIумал, МахIачкъалалия Алпатоволийн хъанай дия 227 километра, мукьра ссятрал ххуллу. 01

КIюрххила жу бавчуру Гудермес шагьрулул чулийнмай. Гудермес шагьрулийн бияннин бацIан баву дакъая. Гудермеслия бувккун, Терек неххал ламу лахъан хьхьичI полициянал бацIан бунну. Мигу федералтал бия. Жу укунсса аьрххилий нанисса бувсукун, миннал, документругу ххал бувну, ххуллухъин зун увкуна.

Алпатово шяравун бивсса чIумал, жу пикри барду цалчин шяраваллил администрациялийн буххан. Микку кIива хъамитайпа бия. Шяраваллил хъунама цахъи хIаллава учIантIиссар, мунал бусантIиссар увкунни цума чув увччуну уссарив. Му учIаннин, ччарча, насияра увкунни чIаравсса Ищерская тIисса шяравун, тиккусса цIусса гьайкал ххал дан. Тиккун дия ацIра километра. Ххуллул чIарав дия гьайкал, дакьингу дурну, ливтIуминнал цIарду ва фамилиярттугу чирчусса. Тамансса фамилияртту, цIарду дия узбакIнал, азирбижаннал. Гандаев тIисса фамилиягу дия Ингушнал ва АьсатIиннал. Жун аьркинсса фамилия-цIа микку къаляркъуна. Жу зана хьуссияв махъунмай Алпатовалийн, шяраваллил хъунама жух ялугьлай ия. Ганан цIа Хасан дия.

— Зу ттул хъамаллу, хIакьину ттучIан дукиялийн ва гьантта бикIан нантIиссару, — куна га­нал.
Хасаннул бувсуна жухь 1990-ку шиннардий гьайкаллу гъагъари дурну диркIшиву. Жу ганан ккаккан бувссия так ца луттирая ларсъсса мужаллатрал чагъарданул копия. ХIандайхъал Рамазан МутIаллил арснал цIагу чара бакъа цIусса улалий чирчуну дикIантIиссар увкунни. Ми цIарду чирчуну, ула дихьлахьи­сса чIумал, чара бакъа оьвчинну увкунни. Жу лавгссияв гьайкал ххал дан.
Гания махъ на чивчуссия чагъар Обороналул министерствалул архиврайн. Му архивгу бур Москавуллал чIаравсса Подольск тIисса шагьрулий.

Уттигъанну март зуруй электрон почталийн жаваб дуркIуна. КIул буван хьуна Гандаев Рамазан МутIаллил арс увну ушиву 1910-ку шинал ЦIувкIрав. ИвкIуну ур 1942-ку шинал декабрьданул 4-нний. Увччуну ур Орджоникидзиевский крайрайсса Наурский райондалий. Шиккува бур чивчуну: «Источник информации 58, источник донесения ЦАМО, номер описи источника информации 18001, номер дела источника информации 619». Тай шиннардий Наурский район ва шяравалу Алпатово дагьлай диркIун дур Орджоникидзиевс­кий крайравун.
Ттун ляркъунни Алпатово тIисса шяравалличIа хьусса къизгъинсса талатавурттаясса макьаларттугу.
Гьаттайн лагавугу, гьав ля­къавугу тIайласса хьуну дур. Та гьаттаву, архиврал информациялийн бувну, увччуну ур 346 инсан.

Ттула чулуха учин ччимур ва бур. Укун талай ливтIуминнан медаллу, орденну дулайссар. Хъирив уккайсса акъахьувкун, укун ливтIуминнан цичIар дуллуну дакъар.
ХIандаев Рамазаннул кулпат Шарипат (Закирдул нину), нава чIивисса чIумал, 1970-ку шиннардий, буслан бикIайва Рамазан, кIийлла повестка дуркIун, военкоматрал кIийлагу махъунай тIайла увккун ивкIсса. Рамазан ивкIун ур, на жагьилсса инсан ура, цIакьгу бур, циванни цув дяъвилийн къаувцусса тIий. Шамилчин, 1941-ку шинал ахирданий, увцуну ур.

Вара гьаттал суратру, цIарду чирчусса та чIумалсса гьайкал тIитIлатIисса суратругу чув-дунугу духьунссар. Ягу кказитирттай духьунссия. ЦIана мигу чув лякъинссар.
Ттула чулуха умуд бур Алпатово тIисса шяраваллил хъунама Хасаннул, бувччуминнал цIардугу чирчуну, гьайкал цIуницIа тIитIлатIийни оьвчиншиврийн.

МахIаммадхIажи
Загьидинов