Къизлардал шагьрулий 1970 шиная шинмай яхъанай бур 1-мур ЦIувкIратусса МахIаммадкьади ва ПатIимат Аьлиевхъал кулпат. МахIаммадкьади, Ташккантлив авиациялул институтгу къуртал бувну, зий ивкIун ур тиккува самолетру дайсса заводрай инженер- технологну. ПатIиматгу тава заводрай зий бивкIун бур. 1970 шинал МахIаммадкьади тIалав увну ур Къизлардал самолетирттал детальлу дувайсса КЭМ- заводрайн инженерну.

---

ПатIимат Рамазанова
— Та чIун жун, жагьилсса пишакартуран, ххуйсса чIун дия. Ташккантлия учIайхту, жун буллуна шанма къатта бусса секция, садикрай душнин кIанугу бувна. Щил ци учирчагу, совет заманнай ххуйсса пишакартал тIалавну бия, даву лякъин къахъанахъисса тагьар да­къая. Таш­ккантлив кIанттул хьуну, давугу канилух дурккун, завод­рал хъуниминначIан, хIурматрай ухьурчагу, дакIмур Дагъусттаннайннай кIункIу тIий дикIайва. Ххаригу хьунав, нава Дагъусттаннайн тIалав уллали­сса баяйхту, — дакIнийн бутлай ур МахIаммадкьади.
КIицI лавгсса заводрай ва зий ивкIун ур цехрал хъунаману, яла, пенсиялийн укканнин, зий ивкIун ур отделданул хъунаману. ЧIярусса шиннардий лажин кIялану бивхьу­сса захIматрахлу лайкь хьуну ур «Граждан обороналул отличник» тIисса цIанингу, медаллан ва хIурматрал грамотарттангу.

ПатIиматгу вава заводрай плановикну, мастерну, пландалул ва диспетчер отделданул хъунмурну зий бивкIун бур. Пенсиялийн букканнин вагу заводрая хIура хьуну бакъар. Вай кIиягу захIматрал ветеранталгу бур. Заводрайгу вайннал фамилия династия хIисаврай машгьурну дур. Арс Руслангу, ванал кулпат Жариятгу личIи- личIисса давурттай тава завод­рай зий бивкIун бур. Руслан зий ивкIун ур цал технологну, яла- машинарттал паркрал хъунаманал хъиривчуну, Жарият — бухгалтерну. Хъунмур душнил Аминатлул арс Шамилгу, университетгу къуртал бувну, зий ур заводрай коммерциялулсса буллалисса директорну. Ши­ккува бусан, Аминатлул цилвагу, Мадина тIисса хъиривмур душнилгу школартту мусил медаллай къуртал бувну бур.

— Жул душвавран ласругу ххуйсса багьунни, жунгу куявтал бавкьусса хьунни. Аминатлул лас, Арсен, яхI бусса жагьил икIайва, аьпабиву, ччяни дунияллия лавгунни. Рязийну буру арснал щар Жариятлуягу, тIий бур ПатIимат.
Ваксса укун бавкьусса, бювхъусса кулпат бушивруву биял­сса бутIа буссар вайннал ужагърал гьайчалину, МахIаммадкьадинал нину, Бича диркIшиврулгу.

— Аьпабиву, ххуйсса ласнал нинугу, бавагу хьуссар. Жу даврий буни, оьрчIру гьарца чулуха ванил щаллу байссия. Низам ххирасса дия, оьрчIангу тIул- тIабиаьт лахьхьин дуллан дикIайва. Цинма ккавксса иширттая буслан дикIайва, учайсса мазралгу пасихIсса дия. ХIатта назмурду чичаврил гьунаргума бия. Мунил шеърирду кказитирттайгу бивщуссия, — буслай бур ПатIимат.
Гьашинусса шин Ма­хIаммад­кьадинал ва ПатIимат­лул ужагърай барачатсса, юби­лейрду гьарзасса дур. МахIам­мадкьадинан апрель зуруй 80 шин хьунни, ПатIиматлун январь зуруй – 70 шин. Вай цачIу яхъанайгу гьашину 50 шин хъанай дур. ДакIнихтуну барча дуллай буру шаннагу юбилей. Тти­гъанну Аьрасатнаву кIицI ларгунни Кулпатрал кьинигу. Кулпатру цIакьссакссар билаятгу цIакьсса учарухха, цIуллушиву дулуннав зу­хьхьун, МахIаммадкьадий ва ПатIимат!