Майрал 1-мур кьини жулла республикалул шагьрулий хьунадаркьунни яргсса, чIявусса инсанталгу гьурттусса шадлугъирттайну. Му кьинисса митинг-концертрив, цIакь хьусса аьдатрайн бувну, хьуна М. Горькийл цIанийсса Оьруснал театрданул хьхьичIсса майданнив.
Бадрижамал Аьлиева
Шадлугъ тIитIлай, ихтилат бувна профсоюзирттал организациярттал Дагъусттаннал республикалул союзрал председатель Аьвдуллагь МахIаммадовлул.
МахIачкъала шагьрулул бакIчи Салман Дадаевлул, бавтIми цинявппагу байрандалущал барчагу бувну, увкуна: «Цимурца жула кIунттихьри бусса. ХIакьину куннасса ххаришиврущал жува жулва шагьру, жулла республика, жулва билаят хьхьичIунмай буллантIиссару», — куну.
Махъру ялагу лавхъуна элмурдал Дагъусттаннал Национал Академиялул член ХIамид Бучаевлул, ПаччахIлугърал «Лезгинка» ансамбльданул директор Жамбулат МахIаммадовлул ва м.ц..
Байрандалул шадлугъирттавух мукунма гьуртту хьуна ДР-лул ХIукуматрал председательнал цалчинма хъиривчу Анатолий Карибов, ДР-лул ХIукуматрал вице-премьер Рамазан Жяъпаров, ДР-лул виваллил иширттал министр Аьвдурашид МахIаммадов, ДР-лул культуралул министр Зарема Буттаева ва цаймигу къуллугъчитал.
Митинг къуртал хьуну махъ дайдирхьуна байрандалул концерт, цувгу сакин дурсса МахIачкъала шагьрулул Культуралул управлениялул ДР-лул Культуралул министерствалул кабакьаврийну.
Байрандалийн бувкIсса оьрчIру тIурча, хъунмасса гъирарай гьуртту хъанай бия сурат дишаврилмур конкурсрай, цалла аьзизсса республикалул, шагьрулул тIабиаьт чагъарданийн гай яла яргми рангирдай ласлай.
