Камиллул арс Имранов Имран
Хархавар бакъа къашавай хьуну, оьрмулул 62 шинаву аьпалухьхьун лавгунни Къяннал шяравасса уздансса зунттал чув Камиллул арс Имранов Имран.
Увну ур Имран 1957 шинал Къяннал шяраву чIяву оьрчIру бусса Камиллул кулпатраву. Шяраву школагу къуртал бувну гава шинал увххун ур Дагъусттаннал Шяраваллил хозяйствалул институтравун. Га бувккуну махъ зий ивкIун ур цала пишалий личIи-личIисса давурттай.
Имран чIярусса шиннардий зий уссия Къяннал колхозрал председательнугу. Колхозру лирну махъ зий уссия Москавлив. Чув ухьурчагу, ссаха зий унугу, Имран ия цала лагма-ялттунащал хIал бавкьусса, чIарав ацIан, ка-кумаг бан анаварсса, хъиншиврул бутIа ххишалану бивсса, адиминаву дикIан аьркинсса цинярдагу ххуйсса хасиятру дусса чумартсса чув.
ХIайп, лавгунни жуятува кулпатрангу ххаллилсса лас, душваврангу ххирасса бутта, уссур-ссуннангу акъа-чара бакъасса чул бищай кIану, чIявусса хияллугу дакIнивува ливчIун.
Имран аьпалул шаврил хъуннасса кьурчIишивугу кIидачIлай, жижара буллай буру кулпатрахь, душваврахь, уссурваврахь, ссурваврахь, миннал оьрчIахь, гъан-маччанахь цинявннахьвагу.
Цал гьав нурданул дуцIиннав, алжаннул ххари аннав. Махънал оьрмурдай барачат бишиннав. Амин!
Къяннал жямат
Загьидинал арс Камилов Камил
Махъсса шиннардий захIматсса цIуцIаврил инжитгу увну, май зурул 9-нний оьрмулул 81-мур шинаву аьпалухьхьун лавгунни чумартсса зунттал чув, иминсса кулпатрал ппу ва лас, хIал бавкьусса, дакI-аьмал хъинсса инсан, БахIикIуллал Загьидинал арс Камилов Камил. Буттал кIанттул цIанийсса дяъвилия ппу ятIа-тIар бакъа зана къавхьукун, Камиллун оьрмулул урчIра шинаву багьну бур хIухчушиву дуллан. Школалийгу ккалай, колхозравугу зий хъуна хьусса Камил ниттищал ва ссищал Каспийск шагьрулийн ивзукун, зун увххун ур «Дагдизель» заводрайн. Пенсиялийн укканнин ванал сурат хIурматрал улттуя чан хьуну дакъар. Ванан тамансса бахшишругу, хIурматрал грамотарттугу, барчаллагьрал лишаннугу дуллуну дур.
Пенсиялийн увккун махъгу, къашавай хьуннин, зукъазий къаацIайва. Камил ия аьчухсса, гьарцаннал чIарав ацIан хIадурсса, хIал бавкьусса инсан. Камиллул хIурмат бия мачча-гъаннал, чIахху-чIарахнал, щарнил агьулданул дянивгу.
Камиллул бивкIулул кьурчIишиву кIидачIлай буру ванал кулпатрахь Щазахь, душварахь Асияхь ва Жамилатлухь, арсурваврахь, куявнахь ва махъсса мачча-гъаннахь. Камилгу алжаннул ххари аннав, гьав нурданул дуцIиннав!
БахIикIуллал
ва Кумиял жямат
ХIамидлул душ МахIаммадова ПатIимат
Оьрмулул 65 шинаву дунияллия лавгунни чумартсса, узданшиву ларайсса, зунттал тIабиаьт-хасиятрай хъунма хьусса, ас-намусрал бувччусса лакку хъамитайпа ХIамидлул душ МахIаммадова ПатIимат.
ПатIимат бувну бур 1954-ку шинал ЧIяйннал шяраву ХIамидлул ва Сагьивлул кулпатраву.
Школалия махъ МахIачкъалаллал машлул училищагу къуртал бувну, зун бувххуна Каспийскалийсса «Детский Мир» тIисса, ттучандалийн. Муния махъ ПатIимат щар хьуну лавгуна цила ласнащал Волгоградрайн. Гийх хасъсса дуккавугу дурну, зий бивкIссар садикрай тарбиячину. Тикку зий ПатIиматлул хьуссар 45-рахъул шинну. Цила даву ххирасса, мюрщи оьрчIаха ххишаласса аякьа дуллалисса ПатIимат хIурматрал грамотарттангу, барчаллагьрал чагъардангу лайкь хьуссар.
Жагьилсса оьрмулий ласгу ивкIуну, ПатIиматлул хъинну хъунмасса захIмат бувссар цила мюрщисса арс ва душ ччаннай бацIан бан.
ПатIиматлул бивкIулул кьурчIишиву кIидачIлай, дакIнихтунусса жижара буллай буру арснахь, душнихь, куявнахь, уссурваврахь, ссурваврахь, цинявппагу гъанцириннахь. Махънал оьрмурдай барачат бишиннав, ва дакIнийнува личIаннав!
ПатIиматлул бунагьирттал аьпа баннав, гьав нурданул дуцIиннав, рухI алжаннул ххари даннав.
ЧIяйннал жямат
Мааьбиял душ Кьурбанова ПатIимат
Майрал 12-нний, захIматсса цIуцIаврища ххассал къавхьуну, дунияллия лавгунни хъинну бусравну оьрму бувтсса, ас-намусрал бувччусса лакку хъамитайпа, Мааьбиял душ Кьурбанова ПатIимат.
ПатIимат бувну бур 1937-ку шинал ЧIяйннал шяраву Мааьбиял ва Написатлул кулпатраву. ПатIимат школагу къуртал бувну, лавгун бур цила уссурвавращал Туркманнавун. Тикку цила уссурвавращал ва гъанминнащал архIал байбивхьуну бур захIматрал ххуллу , личIи-личIисса давурттай зий. Яла щар хьуну махъ ПатIимат бивзун бур Аксайлийн. Гикку яхъанай вайннал хьуссар 55 шин. Хъунигу бувну, дуккингу бувну, цала-цала къатрай бивтун бур 3-ма арс ва 2-ва душ. Махъсса шанна шинай вай яхъанай буссия Новостройлий, Гьамияхь.
ПатIиматлул бивкIулул кьурчIишивугу кIидачIлай, дакIнихтунусса жижара буллай буру ласнахь ХIусайннухь, арсваврахь, душваврахь, махъсса уссур-ссуннахь, цинявппагу гъан-маччанахь.
ПатIиматлул бунагьирттал аьпа баннав, гьав нурданул дуцIиннав, рухI алжаннул ххари даннав.
ЧIяйннал жямат
