Дарбантуллал ва Израилнал дянивсса маччашиву

АхIмад-Хан Султаннул цIа­нийсса МахIач­къа­лаллал аэропортрал директор Арсен ПирмахIаммадовлулИзраилнал Хадера шагьрулул мэрнал хъиривчу Натан Ливиевлущал ва Израилнал Сдерот шагьрулул мажлисрал депутат Хава Нахшуноващал хIала-гьурттуну зунсса кьутIи дунни.

ХIала-гьурттуну зунсса документрай цIакь бунни МахIачкъалаллал аэропортрая ва аэропортрайн цIусса маршрутру тIитIаврил хIакъиравусса пикрирду.
Гихунмай кIивайнналвагу цачIуну ххал бигьин кунни цIусса рейсру тIитIаврил шартIру дузал даврил хIакъиравусса ва цаймигу масъалартту. Израилналмур чулухасса кьутIилий кIицI лавгунни Дагъусттаннайн ва Дагъусттаннал аэропортрайн тIитIинтIисса хайр-мюнпатсса ххуллурду. КьутIилий, мукунма, кIицI лавгунни Израилнал Транспортрал министерствалийхчIин МахIачкъалалия Тель-Авив­райнсса тIайланнасса рейсру тIитIаврил хIакъиравусса пик­рирдугу.
ДакIнийн бутанну, цалчин вай рейсру тIитIин ва кьутIи дансса пикри хьушиву Ххувшаврил байрандалул гьантрай хьусса Дарбантуллал шагьрулул мэр Хизри Абакаровлул ва Израилнал Хадер шагьрулул мэрнал хъиривчу Натан Ливиевлущалсса хьунабакьаврий.
2006 шиная шихуннай Дарбант ва Хадера шагьрурдал дянив цIакь хъанай най ду­ссар уссурвалшиврийсса арарду. ХIакьинусса кьини Хадера шагьрулий ур 15 105 инсан тарихравун багьсса Дарбант шагьрулиясса.

Гьаваллавухсса ххуллу
тIалавну бур

АхIмад-Хан Султаннул цIа­нийсса МахIачкъа­ла­ллал аэропортрай ларгсса шинал январь, февраль, апрель зурдардих бурувгун 18% гьарза хьуну бур пассажиртал, мигу хъанай ур 3459 051 пассажир, 14% гьарза хьуну дур аэропортрая ва аэропортрайн лехлахисса самолетру. Мукунна, 15% гьарза хьуну дур самолетрай ххилаххисса кьай ва почта.

Аэропортрая Аьрасатнал шагьрурдайн ссятрал мутталий лехлай ур 200 пассажир, дазул кьатIувсса билаятирттайнсса рейсирдай тIурча, ссятрал мутталий 60 пассажир лехлай ур.
2016 шинал февраль зуруя байбивхьуну, аэропортрай буллай байбивхьуну бур 8000 квадрат метра дусса, 190 пассажир ссятрал мутталий кьамул уван бюхъайсса цIусса терминал.
ХIадур бувссар
Имара Саидовал