ДР-лул Госжилинспекциялул пресс-службалул бусаврийну, вайннал хIарачатрайну утти ва ведомствалий вичIилун ххуйнучIу къабаяйсса ягу бувагу къабаяйсса халкьуннаясса аьрзри кьамул буллантIисса «горячая линия» зунтIиссар.
Ва билаятрай ттинин царагу региондалий щурущи дан дурасса хIаллихшинна жучIара ишла дуллантIиссар. ХIаллихшинна дурну дур «Всероссийское общество глухих» тIисса жуламур республикалийсса отделениялул сипталий. Ххуйну чIу къабаяйсса ягу бувагу чIу къабаяйсса халкьуннаща бюхъантIиссар WhatsApp мессенджерданийсса 8 (928) 546 16 59 номерданийн цала аьрза, мурад чивчусса смс гьан дан.
«ЖКХ-лул хIаллихшиннардая ва миннухсса багьрая цIухху-бусу бан ччисса, амма чIу ххуйну къабаллалисса ягу бувагу къабаяйсса халкьуннан хъунмасса захIмат шай, щихь ци цIуххинтIиссарив къакIулну, цанма аьркинмунил хъирив лаян къабюхълай. Ва хъунмасса кумагри укунсса халкьуннан», — тIий бур ва отделениялул хъунмур Ххадижат Сулайманова.
