ДучIими
КутIасса справка

Лаккуй ДучIиннал шяравалу дуссар Лакрал райондалул центрдания кьиблалул ва баргълагавал чулийннай, Ханнал-ХIаллийн лажин тIайлану, ЛухIувалу тIисса зунттул лувсса даралуву.ДучIиннал лагма-ялттусса шяраваллуну хIисав хъанахъиссар: НицIавкIул, ГьаркIассун, Маркьи, Сундарали, Гьу­щи-КIувур, Бухцанахъи, ТIюванихи.

---

Совет власть хьуну махъ шяраву школа тIивтIуну бур 1932-ку шинал, цал – кIира шинал школа, яла – байбихьулул школа.
Колхоз сакин дурну дур 1933-ку шинал, мивун буххайсса бивкIун бур ГьаркIассуннал ва Сундараллал жяматру.

ВЦИК-рал декретрайн бувну 1921-ку шинал «Ду­чIиннал шяраваллил общество» тIисса цIанин кIанттай сакин бувну бур ДучIиннал шяраваллил совет (Гъази-Гъумучиял округ).
Хъунмасса Буттал КIан­ттул цIанийсса дяъвилийн ДучIиннал шяравату лавгун ур 58 инсан, минная зана къавхьуну ур 29. Ца буттал – Ибрагьимов Ибрагьимлул аьрай ливчIун ур 3 арс: ИсмайхIажи, Сажид­махIаммад ва Сажид­хIу­сайн.
Зунттава бизан бувну нанисса шинал ДучIиннал шяраву диркIун дур 76 тIюва, яхъанай ивкIун ур 221 инсан.

ЦIуссалаккуйн бивзун мукьах, 1949-ку шинал «Красный Восток» тIисса ДучIиннал колхозгу ва «Путь к коммунизму» тIисса НицIавкIуллалмур колхозгу цачIун дурну, колхозран дирзун дур Маленковлул цIа. Ца шинавату ялагу даххана дурну, дирзун дур «Правда» тIисса цIа. Му колхоз райондалийгу, республикалийгу хIисавну диркIун дур ца яла хьхьичIунмунин.

ХIакьинусса кьини Ду­чIиннал жямат лащу-щал­луну яхъанай бур Новостройрай. Бур администрация, зий бур дянивсса даражалул школа.
Махъсса шиннардий Ла­ккуйсса цала буттал шяравун ивзун, ДучIиннал цIагу цIу дуккан дурну, кIикку яхъанай уссия жула лак­рал машгьурсса чичу аьпа биву Зияуттин Айдамиров. ХIакьинусса кьинигу кIиккува яхъанай бу­ссар Зияуттиннул кулпат ПатIимат.