Апрельданул 18-30-нний, Ххувшаврил кьинилун хасну, нантIиссар Москва-Курск-Волгоград-Элиста-МахIачкъала-Дарбант-Джульфа (Азирбижан)-Тебриз-Тегеран-ИсвахIан-Шираз-Еушар (Иран)-Доха (Катар) тIисса шагьрурдайнсса автопробег.
Ванил сакиншинна дурсса «Русский Час» медиакомпаниялул аьрххилия махъ хIадур дантIиссар автопробеграясса ва цанма ккавкмуниясса, бавмуниясса фильм. Вай кIирагу проект хас дурну дур Ххувшаврил кьинилун. «Тегеран 43» тIисса цIанилу ккаккан дантIиссар халкьуннан.
Автопробег дайдирхьуссар Москавливсса Поклонная Гора тIисса кIанайсса Ххувшаврил МузейрачIату. Ванивух гьурттуну ур Аьрасатнавусса Катарнал вакил Ф. Аль-Аттийя. Аьрххилий ккаккан бувсса шагьрурдай пробеграл гьурттучитал биянтIиссар агьалинаву ца яла машгьурсса ва ххира хьусса тарихрал кIанттурдайн ва хьунтIиссар хъун дакъасса батIавуртту ва дусшиврийсса хьунабакьавуртту.
Ялугьланну жувагу хъамал жула аьрщарайн бияннин!
