Щалагу Аьрасатнаву интнил каникуллай аьдатравун дагьну дур оьрчIал луттирдал ва музыкалул нюжмар кIицI лаглагисса шадлугъру дуллалаву. Москавлив хьусса оьрчIал луттирдал ва музыкалул нюжмарданун хас дурсса мероприятиялул сакиншинначиталну хьунни Дунияллул халкьуннал музыкалул ишккаккултрал союз, Чичултрал ва Композитортурал союзру, оьрчIал фондру ва цаймигу идарартту.
Имара Саидова
Дагъусттаннал чулуха микку гьуртту хьунни Аьрасатнал искусствалул лайкь хьусса ишккакку, ДР-лул Музыкантътурал союзрал правлениялул председатель Хан Баширов.
Шиккува кIицI лаган, Хан Баширов Москавлив ва Центральный федерал округрал шагьрурдай хъанахъисса оьрчIал къатрал, реабилитациялул ва гериатрический центрдал оьрчIансса ихIсандалул акциярдавухгу цимилгу гьуртту хьуссар.
Машгьурсса музыкант ва ххуллухгу гъирарай хьунаавкьунни ялун нанисса никиращал. Бувсунни оьрчIахь зунттал билаятрал авадансса тарихрая, щаллу бунни цала композицияртту, дурккунни Дагъусттаннал шаэртурал назмурду, ккаккан дунни цува гьурттуну ларсъсса кинордавасса фрагментру.
Мероприятиялул лагрулий ца яла дакIний личIанмур бутIану хьунни Расул ХIамзатовлул гьайкалдануцI тIутIив дишаву.
