Хъарас щаврил байран жула щархъаву ччянияцIара лахъа-хъунну кIицI дуллалисса, мюрщинангу, хъунанангу ххира хьусса байран дур. Бархъаллал шяраву тIурча, му кьини ляличIинура гурну ва лахъа-хъунну кIицI лагай. Бархъаллал дур ва байрандалуцIун дархIусса цанна хасъсса аьдат­ругу.

---

Андриана Аьбдуллаева
Шяравалу шанма саклийх дарчIуну, ца-ца шинах ца-ца сак­лия увчIай Хъун Хъузала. Гьашину хъарас щаврил хъар лахълай ия 85 шинавусса, бусса оьр­мулий колхозрал давурттай зий ивкIсса, шяраваллил жяматрангу бусравсса, арулва оьрчIал ппу – МахIаммад АьлихIажиев.
КIюрххила Хъун ХъузалачIа ва щала саклий тIивтIуну бия дукьрахIантту, хьхьахьхьартту бивхьусса, ва цаймигу лакку дук­рардал авадансса ссупрарду. Хъузалагу барча увну, бисмиллагь бувну махъ цинявппа був­ккунни къурув. БархъаллачIа дур ттунна цайминначIа къа­ккарксса ва аьдатгу. Хъузала шавату увккун нанийни мунал ял­тту кIурчIулттувух щин рутIай. Аьдат­райн бувну, бакIлахъия авадансса дикIаншиврул. Хъузала, ялтту щин рутIлай, чят увай цалчинсса хъарас щуну, гьанна бивщусса чIумалгу. Ва аьдат дуллай, цинявппа кувннал кувн­найн щин рутIлай, мадарасса хIаз ласай.

Муния махъ жямат ва хъамал бувкIуна шяраваллил майданнив. Шикку гурну най бия дялахърулул мажлис – балайрду, къавтIавуртту. Яла байбивхьуна лечаврил, дучри ххяххан баврил бяст-ччал. Бархъарав Хъарас щаврил байрандалийн мудангу чIявусса хъамал бучIай. Ва ххуллухгу, лагма щархъаясса хъамал къахIисавну, 250-нния ливчусса туристал бувкIун бия шяравун. Миннавух бия гуржи, армани, оьрус.

Лечаврил бяст-ччал хьунни хъамаллурал, щар дуцинсса жагьилтурал, бугьараминнал, мюрщиминнал, дуклаки оьрчIал, хъами-душварал дянив личIи-личIину. Ххув хьуминнан дуллай бия кьярчив (бартри) ва арцуйнусса бахшишру. Хъамаллурал дянивсса бяст-ччалливу ххув хьуну бахшиш ларсъсса яручу ххарил лехлай, утти гьарца шинах Бархъарав Хъарас щун учIаванна тIий ия.

Мяйжаннугу, Бархъаллал шяраву ва байран чувнияргу хIазну лагай, мунияту ши­ккун бувкIсса ва бучIан ччиссагу чIявусса бикIай.
Цинявппагу туристътал, ялун­чIингу бучIанну тIий, рязину бия.
АьлихIажиевхъал кулпат­рал дакIний личIансса унгу-унгунусса байран дунни жямат­рангу, ялун бувкIминнангу.