Апрельданул 3-нний Ма­хIач­къалалив «Бела­русь-Дагъусттан» тIисса проектрал лагрулий III-сса Халкьуннал дянивсса литературалул ва тарихрал форум хьунни.Ванил сакиншинна дурунни «Дагъус­ттаннал уздантал» ДРОО-лул ва «Беларусьнал Чичултрал союз» ОО-лул.

З. АьбдурахIманова
ЦIубакIрай форумрал гьурттучитурал Лениннул комсомолданул цIанийсса паркравусса КIул акъа­сса саллатIнал гьайкалданучIа тIутIив дирхьунни. Шиккува кIицI лаган, форум сакин був­ссар Аьрасатнал Федерациялул ва Беларусь Республикалул дянив кьутIи цIакь дурну 23 шин хъанахъисса иширан хасну. Ца жулла республикалий дакъа­ссагу, вай гьантрай билаятрал цайми регионнайгу ва иширацIун бавхIуну личIи-личIисса шадлугъру, батIавуртту хьунни.
ГьайкалданучIасса шадлугъраяр махъ Национал библиотекалий хьунни Миллатирттал дянивсса «Беларусь-Дагъусттан» рувхIанийсса маччашиву» тIисса цIанилусса ккуркки стол. Ванийсса гьурттучитуравух бия республикалул жяматийсса иш­ккаккулт, вузирдал, ссузирдал студентътал, Беларусьнавасса хъамал. Гьуртту хьунни батIаврий мукуна ДР-лул миллатирттал политикалул ва диндалул иширттал министр Энрик Муслимов ва цаймигу министерстварттал ва идарарттал вакилтал.
БатIаву дачин дурсса «Да­гъусттаннал уздантал» ДРОО-лул каялувчи Каримхан Оьмахановлул, Беларусьнава бувкIсса хъамаллуращал гьурттучитал кIулгу бувну, махъ буллуна Энрик Муслимовлухьхьун. Ванал, гьашину Беларусьнал аьрщи фашистурал аьралуннацIа марцI дурну 75 шин хъанахъавугу барча дурну, кIицI лавгунни жула кIивагу билаятрал миллатирттал кьадаргу, тарихгу цава-ца бушиву. «Беларусьнал Чичултрал союз» ОО-лул цалчинма хъиривчу Елена Стельмахлул, Дагъусттаннай цивппа кьамул баврихлу дакIнихтунусса барчаллагь тIий, кIицI лавгунни Хъун дяъвилул гьурттучитуран хасъсса аьпалул махъру жува ттигу цимилгу тикрал бантIишиву ва миннан хасъсса цачIусса батIавуртту ттигу жула дянив цимилгу хьунтIишиву.
— Дагъусттан, мяйжаннугу, хъамал кьамул бан кIулсса, дусшиврул кьимат буруччайсса кIану бур. Зул хъус бюхттул зунттурду ва Каспий хьхьири бухьурча, жулмур республикагу аваданссар вацIрал. Мудангу ххариссару ва ялугьиссару утти зу жула аьрщарайгу кьамул бан,-увкунни Е. Стельмахлул.
«Цинявннал цачIу ларсъсса Бюхттулсса Ххувшаву» тIисса док­лад бувунни хъирив Беларусьнал тарихрал элмурдал доктор Анатолий Шарковлул. Ванал кIицI бунни цала республикалий волонтертурал, жяматийсса ишкка­ккултрал, дацIан къариртун, нани дурну душиву дяъвилул талатавуртту най диркIсса кIанттурдай лявкъусса саллатIтурал цIа-бакI кIул дуллалисса хъиривлаявур­тту.
Хъиривмур кьини форумрал сакиншинначитурал хъамал бувцунни Дарбантлив, Гъунив ва «АхIулго» мемориал комплекс­райн.