Акъахьунссар Каспийскалий Лениннул ва Стальскийл цIанийсса кучардал мукьбачIулийсса ссяткарнал кIяла киоск къаккавксса ва, аьркиннугу-къааьркиннугу, гивун къаурувгун, чIарах увксса.ЧIярусса шиннардий шиву ссяткарну зузисса Бархъаратусса Мяммал арс Аьбдул МахIаммадов утти, махъа-хьхьичIа, кIул хъанан ивкIунни ка мусилсса художник хIисаврайгу.

---

Залму АьбдурахIманова
Аьбдул МахIаммадовлул давурттал «Ссяткарнал театр» тIисса выставка дусса хьхьирицIсса Цалчинмур галереялийн нани ххуллий, киоскравун бурукъавгун, чIарах буккан къабювхъуна. Лавкьусса киоскрал чIавахьулттивух итталун дагьуна ганил залуннал, дахьра дуллай айивхьуну, дунийра кьадиртсса цIусса миниатюра.
ХIаз бия га кьини галереялийн бувкIсса 5-6-ми классирттал оьр­чIан.

[dropcap]И[/dropcap]ттан чIалай-къачIалачIисса мюрщи бузри, матахI ишла дурну бувну бия жула зунттал щархъавува ливчIсса, някIсса сиргу бувксса хьулу-чIавахьулттивгу бусса, тавхантту, гиву – хъяр-хъяр тIий щаращисса кIункIур бивзсса муххал пач, тиннай – дахьва кIункIурдува бувксса кIирисса ххункI-дикIул ланжари, дукьрахIанттил гьарацIи – хIасил, зунттал халкьуннал гьар кьинисса къайгъурду, ичIувасса кушурду… Дур миниатюрарду балугъру бугьлай, къалпузру бахлай, нувщи бихлай, оьл ттизлай ва цаймигу иширттаха зузисса куц ккаккан бувссагу.

[dropcap]Б[/dropcap]ур ккурчIав щябивкIсса бартукьирттавусса ва къуттакьяправусса къужри, дур чIивитIу гьуркку уллалисса къари-бава, бур ппал дюхлахисса, зукка ритлатисса хъами. Зун ккаккан хъина бярал чIултти, синааьрщарал тIахIунтту дуллалисса бархъарахъами, къалпузирттал дянив щяивкIун чяйлул стакан хIачIлачIисса узбакI-адамина, аьнакIан лачIа бичлачи­сса къари, чIиникI байл буллалисса ва мухI батлатисса чиваркI…

[pullquote]Выставка нанисса мутталий, сакиншинначитурал бусаврийну, шиккун 4000-нния ливчусса тамашачитал бувкIун бур. [/pullquote]

[dropcap]В[/dropcap]ыставка нанисса мутталий, сакиншинначитурал бусаврийну, шиккун 4000-нния ливчусса тамашачитал бувкIун бур. Аьбдул увну ур Каспийскалий, шиккува хъунагу хьуну ур. 1979 шинал ичIаллил сянатир­ттал комбинатрайн зун увххун, лавхьхьуну бур ссяткарнал пиша. ЧIярусса шинну хьуну дур ванал МахIачкъалаливсса Е. Исинбаевал цIанийсса стадиондалий теннисрал тренернугу зий.

— Аьбдул, буси, вай аьжаивсса затру дуллай, вайннуха зун дакIнийн багьан ци савав хьуссарив.
-Ца ацIра шинал хьхьичI, ттулла цIуллу-сагъшиву сававну, на агьунав хIакинтурахун. Ссяткарнал пишагу мюршсса деталлацIун бавхIусса пиша бухьувкун, азарханалийгу кару ссаха-дунугу зузи дуллансса гъира бия. Чагъардая, килпитирттая, пластилиндалия ва-та дуллай айивхьусса на, хъин хьуну мукьахгу, ттуйна нава увкIукунгу, ттувува чантI увкусса му гъира кьабитан къабювхъуна. Даврия увкIун махъ шаппамур пиша вайннуха зузисса хьуна.

Дарзину зузисса ттул кулпат Альбинагу булувкьуна ттул хияллу дузрайн буккан буллалавриха зий. ЧIирайхдахIуртту, бартбисуртту, хъаттирду, шану-кIараллу, чIавахьулттайсса пардавртту – вай цимурцаннул щаллушинна ванил дувайссия. Нарив ишла дувайссия канилун дагьсса цимурца. Къатрал ремонтирттая лирчIсса обойрду, ламинатрал касакру, пюрунтру, синааьрщи, ссятурдия лирчIсса кьалакьив, пластикрал шушри, аьрщарай ххярхсса тIутIи-къатIрал кьяртив, сир, кираж… ХIасил, цимурца. Гьарца макет дан хьхьичI на, цал мунил дайдихьу ттула бакIраву ляхъан дурну, хъирив чагъарданий суратгу дирхьуну, цимилгу дакьингу дурну, ххалгу диргьуну, дуллай сукку шайссара.

-Выставкалия махъ вай давурттал гихунмаймур «кьадар» цукунссар би­кIантIисса?
-Цалсса къакIулли, тIайлану бусан. Бур МахIачкъалалив укун­ссара выставка дувара тIий тава­къюрду буллалиссагу. Рестораннал, кафердал, патирдал, салоннал заллухъругу бур цан вай даххи тIутIиссагу. ЧIаланссар гихунмай.
-ТIайлабацIу баннав вин, муниярвагу камил хьуннав вил бюхъу-тяхъа!