Дагъусттаннал тарихраву лирчIун дур паччахI Николай II Дарбантлив увкIсса кьини. Ва иш хьуну бур 1914 шинал ноябрь зурул 25-нний. Дяъвилул ишру нанисса Ккавкказнаву ци тагьар дурив ххалдан ялтту уккан нанисса паччахI ливккун ивкIун ур Дарбантлив.

---

Ва лахъа-хъунну хьунаакьин вокзалданийн бувккун бур Дагъус­ттаннал областьрал яла хъуними къуллугъчитал ва махъ нанисса инсантал: Дагъусттаннал областьрал губернатор, генерал-лейтенант С. Вольский, аьрали ва граждан идарарттал хъуними, ххачпараснал ва бусурманнал диннал хIурматлувсса вакилтал. ПаччахI хьунаакьин бувксса Да­гъусттаннал бусурманнал делегациялул бакIчину ивкIун ур ЧукIнатусса Чупалав-кьади. Ва хьунабакьаврий Чупалав-кьадинал бюххансса махъ лавхъун бур. Ванахь барчаллагь тIий, паччахIнал кIицI лавгун бур цува хьунаакьин бувкIминнавух бусурман диндалул ишккаккулт бушиврия цува рязишиву ва миннайн цала хъуннасса вихшала душиву. Чупалав-кьадинан Николай II бахшиш дурну дур мусил щин дурксса тургу, хачгу.

Му ппурттуву паччахIнал аьралуннаву талай бивкIун бур Дагъус­ттаннал чиваркIунная салкьи хьусса кIива полк. Дагъусттаннал аьрщарай ливксса паччахI лайкьну кьамул ан вокзалданийсса ресторандалуву тIивтIуну бур авадансса ссупра. Та чIумал тикку бивкIсса инсантурал бувсмунийн бувну, столлу гъагъавай бивкIун бур дахха-дахханасса дукрардал. ЧIюлусса столданухгу ябивтун, паччахIнал цIувххуну бур:
-Цими журалул дукра дуссар шикку? — куну.
-РяхцIаллий кIира, — жаваб дуллуну дур старостал.
Му чIумал паччахIнал цIув­ххуссар тIар: «Цанни шикку нувщи ва калан бакъасса?» — куну. Гьанавиххи хьусса старосталгу га цIана бучIан бувну бур нувщи ва калан.
Ца нюжмардува паччахI ДарбантливхчIина махъунай лавгун ур.

Ва хьунабакьаврий паччахIнал тур бахшиш дурну диркIсса Чупалав-кьадинал гихунмайсса кьадар цукунсса хьуну бурив кIул бан ччай на цIухху-бусу бувссия ванал арснал арс, ттула ниттилгу ссурахъу Чупалав Сулаймановлухь. Ванал бусласимунийн бувну, Чупалав-кьади ивкIун ур аьрабрай дуркку­сса, жяматран бусравсса, уздансса адамина. Ванайн оьвчайсса бивкIун бур оькки-ххуймунил дазу рищун къалмакъал, питна хьунийн дяниялу дан, маслихIат ккаккан. Ванал мукъул сий хъуннасса диркIун дур. Ва зат тасттикь бан кунма, ва хаваргу бусанна. Чупалав-кьадинал бивкIун бур 3 арс ва 3 душ. Хъунмур душ Гьинди хьуну бивкIун бур вайннал цала къушлин лайкьсса, шяравучу Мирзаханов Аьвдулмажидлун. Ва Дагъусттаннал наркомземрал хъунаману ивкIссар. Гьинди оьрчIах бивкIуну бур.

Мунияр махъ цамур щарсса дурцуну, ганиягу личIи хьуну, Аьвдулмажидлул лихъан бувну бивкIун бур Чупалав-кьадинал арснан НурмахIаммадлун буцин кусса душ. КIивагу чул данди бавцIусса кIанайн увккун ур кьатIату нанисса Чупалав-кьади. Инсанталгу паракьат бувну, АьвдулмажидлучIан увххун, куну бур: «Ина лихъан був­сса душ ттул арснан буцин увкусса душри. Жунма питна аьркин ба­къар. Душ итабакьи, на вин ттула чIивимур душ булунна», — куну. Укун Чупалав-кьадинал буллуну бур 14 шинавусса цала душ Закират 40 шинавусса адаминан. Закират Аьвдулмажидлун буцлацисса чIумал, чIутIул аьму бувцIусса ашрапиртту бивкIссар къалимран тIий буслан дикIайва ттул ниттил ниттилссу Тамари. КъакIулли му цуксса мяйжансса затрив
Чупалав-кьади, диндалул ишир­ттацIун бавхIуну, хъунмурчIин Щурагь икIайсса ивкIун ур. Ши­ккугу ванал къумукь щарсса диркIун дур. МуницIагу Ххадижат тIисса душ бивкIун бур. Вагу хъинну бакIрал ххуйсса бивкIшиврия буслан бикIайва.
Зувилку шиннардий щалагу билаятрайх ппив хьусса репрессиярттал мугьалттухьхьун Чупалав-кьадигу иривну ур.

Революциялийн къаршисса «Урватул вуска» («Крепкая рука») тIисса исламистурал организациялуву ивкIссар тIий, чIявусса хьхьичIунсса, аьрабрай дуркку­сса жула аьлимтуращал Чупалав-кьадигу ссивир увну ур. Му чIумал ванан 72 шин диркIун дур. Ураллайсса дуснакьрайн увкIсса чIумал, дуснакьрал хъунаманал оьрмулул угьарасса Чупалав-кьади ккаккайхту: «Къужай, на ина шиву щякъаитанна, вина ччинийн насу, так Дагъусттаннайн малагара», — куну, итаавкьуну ур. Чупалав-кьадигу УзбакIнавун – Чимкент шагьрулийсса цала арсначIан Малла МахIаммадлучIан лавгун ур. КIира шинава ивкIуну, тихва увччуну ур. Вана ва Малла МахIаммадлун хьуну бивкIссар ттул ниттил ни­ттилссу Тамари. Вагу хъинну бакIрал ххуй­сса, чIявуссаннал буцин ччисса душ бивкIун бур. Ттуннагу ххуйну дакIний дур лажиндарава марцI-кIяласса, чаннасса яругу бусса, дугьара хьуну махъгу жагьилний­сса ххуйшиврул лишанну яхьу­сса Тамари-бава. Та паччахIнал дуллуну диркIсса тургу, Чупалав-кьадинал Малла МахIаммадлун дуллуну, вайнначIа диркIун дур.

Кулакталли тIий, хъус-хъиншиву зехлахисса чIумал, Тамари-бавал цила буттукьри Ккурклив ссичIан биян бувну бивкIун ур. Буслан дикIайва, аьравалттай дирхьуну, бартбисуртту, ду-дакъамур зерххуну лагайва тIий. Тур тIурча, хьхьурай багъравусса гьивхьхьул мурхьирал лув дурччуссия тIий дия. Вайннал чув ци ларитайрив ккаккан хъирив бавцIуну бивкIхьунссия шяравасса инсантал, кIюрххил, аьрщигу дир­ххун, тур щиллив ларсун ляркъуну дур. Хач махънингу мусил кьай ду­сса чIивисса буттукьраву бивхьуну бикIайва, яла ци бувссияв къакIула тIий ур вайннал арс Чупалав. Къат­ригу зерххуну, буккан бувсса чIумал, Тамари кIива мюрщисса оьрчIащал цичIанма бувцуну бур ласнал ссийл Закиратлул. Вайми кIивагу оьрчI бувну бур шагьрулийн бивзун махъ. Малла МахIаммадгу шилу ивкIуну ур оьрмулул 58 шинаву. Вайннал оьрчIругу ххуйсса къуллугъирттай, жяматран бусравну буссия. ЦIана так ца Чупалав ур сагъну. ОьрчIал оьрчIру цинявппа дурккусса бур, ххуйсса давурттай зий бур. Тамарин цIа дирзсса ца арснал душ, экономикалул элмурдал кандидат, цIана Американаву, Майями шагьрулий ялапар хъанай бур.

Чупалавл, махъуннай зана дурну, цIу дуккан дунни таний зер­ххуну диркIсса ва тания шихуннай ЧукIуннал школалул ишла дуллай диркIсса буттал къатри. Шиккува бусан, Чупалавл кулпат Светланагу Чупалав-кьадинал арснал МахIаммадаминнул душри. Вай кIия уссил оьрчIру хъанай бур. Светлана жула бусравсса Арсен Буйдалаевичлул ссурахъур цуппагу.
Репрессиярттахьхьун иривссар Чупалав-кьадинал душ Закират бувцуну ивкIсса Аьвдулмажидгу. Беломорканалданийн гьан увну, тих ивкIуссар. Закиратгу чIивисса оьрчI канихьну ливчIссар. Чупалав-кьади реабилитациялул хьун увссар 1990-ку шинал.

Андриана Аьбдуллаева