Диша ччаву дуну ниттил мазрал дарс

11-мур гимназиялул ниттил мазрал учитель
Самрат Рамазанова ва Асли МахIаммадова

Ларгсса хамискьини МахIачкъалаллал 11-мур гимназиялий шанна кьини лахъи ларгсса «Яла ххуйма ниттил мазрал учитель-2019» тIисса конкурсрал хIасиллу дунни.Ваний гьуртту хьунни Республикалул КIулшиву дулаврил министерствалул, вузирдал пишакартал, чичулт ва жяматийсса ишккаккулт.

Залму АьбдурахIманова
Шанма гьантлул дянив гьур­ттучитурал дирхьунни тIиртIу дарсру, бувунни мастер-классру ва, ххалгу диргьуну, ккаккан дурунни жюрилун цала-цала инновациялул проектру.
Ххув хьуминнал цIарду бусан ва бахшишру дачIин хьхьичI хъамаллуран хъун дакъасса концерт ккаккан дурунни гимназиялул дуклаки оьрчIал.
Республикалул школардаясса 38 учитель гьурттусса ва конкурсрал циняр ятIапругу лайкьну дурурччуну, 3-мур кIанттун лайкь хьунни Лакрал райондалул Уриннал школалий зузисса МахIаммадова Асли ХIасаннул душ.

КьатIаллил мазурдил факультетгу къуртал бувну, Уриннал школалий зий 37 шин хьуну дур ванил. Ингилис ва оьрус мазрал дарсру дихьлай бивкIнугу, Аслил дакIниву ниттил мазрахмур гъира такIуйвагу лекъащайсса бивкIун бур. Конкурсрайнгу ванил хIадур дурну дур Бадави Рамазановлул творчество ва ванал «Урша гъавгъ душ» тIисса назму гьанулун ларсъсса дарс.
КIилчинмур кIанттун лайкь хьунни Каспийскалиясса табасаран мазрал учитель Гулмира Мамедова ва цалчинмур кIанттунгу — Гъуниннал райондалийсса Ругъужиял школалул учитель Сапият МахIаммадова.
ДР-лул КIулшиву дулаврил министерствалул пишакар Людмила Шяъвановал ххув хьуминнан, министерствалул чулухасса барчаллагьрал махъругу куну, арцуйнусса бахшишру ва тIутIал кацIру буллунни.

ДакIнихтуну барчаллагьрай бур Асли ва давриву цицIунма кабавкьусса ва цила чIарав бавцIусса Лакрал райондалул кIулшивуртту дулаврил управлениялул хъунама ХIамзаев Явсупанайн, ванал хъиривчу Макьаева Соняйн, ДГПУ-лул ниттил мазрал факультетрай зузисса Шабанова ПатIиматлуйн, Хьурттал школалий зузисса ХIамзатова Гулбикалуйн, Тахо-Годил цIанийсса ДНИИП-рал хьхьичIунсса пишакар Мутаева Светланайн, Рамазанова Самратлуйн, Буттаева Камилатлуйн, ХIамзатова Асиятлуйн, шаэр Бадави Рамазановлул душ Изабеллайн ва цуппа зузисса Уриннал школалул коллективрайн.
Барчагу буллай, чIа учин ччай бур Аслин вания гихунмайгу тIайлабацIуртту!

P.S. Конкурсрай ттунма хIисав хьусса ци бия учирча – махIаттал бизлай бия укунсса журалул давриву жула миллат­рал чулуха ца-кIия учитель гьуртту шаву. Мисалдаран, чачаннал чулухагума шама-мукьа учитель гьурттуну ия.