[dropcap]В[/dropcap]ай гьантрай хъуншагьрулул бакIчинал хъиривчу Запир АлхасовлучIа хьусса ба­тIаврий ххал бивгьунни «150 школа» тIисса республикалул проектрайнсса конкурсравун МахIачкъалаллал 45 школагу бутлатишивриясса агьамсса ма­съала.

КIицI бунни гьарца школалун республикалул бюджетрава кIи-кIива миллион итабакьлакьишиву. МиннуцIун ца школалун харж хьунсса арцува муниципал бюджетравагу итабакьин багьлагьиссар 5% ва меценатътурал кумаграйну дучIан дурсса арцулгу 15% .

Школартту бакьин бан хьхьичI ххал дантIиссар хьхьичI­ра-хьхьичI магъив, классирттал ва кабинетирттал аьмсса тагьар, санузеллу, хьулу-чIавахьулттал ва нузкьунттал тагьар, щинал ва гъилишиву нанисса бургъурду, батарейкартту.
Хасъсса комиссиялул, 45-гу школалийх бувккун, цинявннул тагьар ххал дурну, цумур школа проектрайн бутан бурив ххал бантIиссар. Конкурсрайн­сса аьрзри кьамул буллантIиссар апрельданул 15-нин.

ЧIурчIав дурунни, школартту бакьин байни, хъуннасса къулагъас дан багьлагьишиву цIу лачIаврия мюхчан байсса система цIу даврихгу. ХIасил, проектрайн багьсса школалул каялувшиндарахь дуссар ихтияр ми арцух школа гьарта-гьарза бан багьлай бухьурча, цIусса корпус банссагу. Мугу – комиссиялул дуллусса ихтиярданийн бувну.