Дуккаврих, кIулшивурттах гъира буманахун цичIавгу дахкъачай цала мурадирайн иян ва, ххуйсса пишакаргу хьуну, оьрмулул тIайласса ххуллу язи бугьан.
Ххарисса хавар бувкIунни Воронежрая Бархъаллал шяравасса ЯхIъяевхъал кулпатравунгу. Вайннал арс, ХIусайн, Тамбовуллал областьрайсса Мичуринскаллал паччахIлугърал аграр университетрал экономикалул факультетгу ЯтIул дипломрай къуртал бувну, утти диссертациягу дурурччуну, экономикалул элмурдал кандидат хьунни тIисса.
Залму АьбдурахIманова
ХIусайннул хIазран бакъар, ва журалул дуккаврил идарагу язи бувгьуну, мивун дуклан ухханшиврул школалийва хIарачат буллай ивкIсса. Ва цувагу аьрщараха, ризкьи-кьинилуха зузисса нитти-буттал къушлий хъуна хьусса, захIматрал кьимат кIулсса жагьил ур. Хъунагу хьуну ур ХIусайн Бабаюртуллал райондалийсса Бархъаллал къутандалий. Ванал нитти-буттал – ХIусманнул ва Чапаевкалиясса Саригуллул сайки 30 шин хъанай дур, шикку миналулгу хьуну, зий-захIмат буллай.
ОьрчIал кIулшивурттал ялув бавцIусса нитти-буттал, цивппа яхъанахъисса кIанай школа бакъа тIий, ХIусайн Каспийскалийсса школа-интернатрайн дуклан тIайла увккун ур. ХIасил, ЯхIъяевхъал кулпатраву кIулшивуртту ласаврих хъуннасса къулагъас душиву чIалай бур вайннал душ Хамисатгу, ЯтIул дипломрай Дагъусттаннал медициналул университетгу къуртал бувну, цIана ординатуралий дуклай бушиврух бурувгун.
ХIусайн университетраву дуклакиссаксса хIаллайгу, вузрал каялувшиндарал тIайла уклай, гьуртту шайсса ивкIун ур студентътурал дянивсса олимпиадарттай ва конкурсирттайгу. ДуккаврицIун цува дуклакисса шагьрулул цачIундур командалущал футболданул ва куклумур атлетикалул бяст-ччаллавухгу гьурттушиву дайсса диркIун дур.
Укун хIарачат бусса жагьилнахь вузрал хъуниминналгу, архIал дуклакиминналгу тавакъю бувну бур цачIавасса аспирантуралийн уххан. Шикку дуклай уна, ХIусайннухьхьун ихтияр дуллуну дур Мичуринскаллал аграр университетраву дарсру дихьлангу. Утти тIурча, экономикалул элмурдал кандидатгу хьуну, ванал хьхьичI ва элмулувунсса ххуллу-хха хъиннува гьарта хьушиврун хIисав бан бучIиссар.
Барчаллагь ХIусайннул нитти-буттан, укунсса арс тарбия аврихлу ва тIайлабацIу хьуннав цан вания гихунмайсса оьрмулувугу.
