Апрель зурул ххюнний Суздаль шагьрулий дайдирхьуссия щаллагу дунияллул халкьуннал дянивсса фестиваль-конкурс STARGATESOFTHEWORLD. Ваний гьуртту хьунни «Лезгинка» ансамбльданул школа-студиялул къавтIалтгу.
ПатIимат Рамазанова
«Халкьуннал къавтIаву» тIисса номинациялий гьуртту хьуну, вайннал зунттал халкьуннал къавтIаврил премьера хIисаврайсса «Джигитътал» тIисса къавтIаву дунни. Жюрилул махъ ца бувну, вайннан буллунни цалчинмур кIану.
-Делегациялувух уссия 16 инсан, Дагъусттаннал лайкь хьусса артист Усманов Рамазан, нагу, къавтIалтгу. ЦIусса къавтIаврил премьералийн, гьай-гьай, жу бюхъу-хIарачатрай хIадургу хьуссияв, ххувшаврищал зана хьунгу, гьай-гьай, тIааьнни. Укунсса ххувшавурттал жувунгу, жул учениктуравунгу хIарачат буллансса шавкь ххишалану рутлатиссар, — тIий бур ва студиялий каялувшиву дуллалисса цIанихсса хореограф, Дагъусттаннал магьирлугърал лайкь хьусса ишккакку Тарият Къапиева.
ЧIа тIий буру Тариятлунгу, ванил каялувшиву дуллалисса студиялул къавтIалтрангу цIусса ххувшавуртту!
