Вай гьантрай ДР-лул культуралул министр Зарема Буттаевал кьамул бунни инсантал. Ва ххуллух министрначIан увкIун ия 8 инсан.
Бадрижамал Аьлиева
Авгъаннал Ветерантурал координациялул советрал каялувчинал хъиривчу МахIаммад Арипов увкIун ия В. В. Макаровал цIанийсса Аьрали славалул музейрал директор Жаннат Сагидован «ДР-лул культуралул лайкь хьусса зузала» тIисса цIа дулавриву кабакьу бувара тIисса тавакъюращал. Министрнал кIицI лавгуна махъа нанисса ник ватан ххирану тарбия шавриву Жаннат Амирхановнал дуллалисса хъуннасса даврил кьимат цачIава бушиву ва му масъалалийн дагьайсса тапшур бавуртту хасъсса отделданийн тIайла дуркшиву.
Н.А. Римский-Корсаковлул цIанийсса Санкт-Петербургуллал консерваториялувун дуклан буххан кабакьу бува тIисса тавакъюращал бувкIун бия Сяидат Ибрагьимова. Министрнал бувсуна Аьрасатнал Культуралул министерствалийн тIайла бувкшиву ва душнил цIанийсса целевой дуккаврийнсса аьрза, мунинсса официал жаваб дучIайхтура цал баян бувантIишиву. Шиккува кIицI лаган, ДР-лул Культуралул министерствалул мудангу кабакьу буллалиссар республикалиясса жагьилтал целевой направлениярттай билаятрал творчествалул вузирдавун дуклан буххавриву.
Мукунма махъсса цинявппагу масъаларттайн багьайсса бувчIин бавуртту ва тапшур бавуртту дунни министрнал.
