Апрельданул 13-нний ДР-лул Шяраваллил хозяйствалул министерствалул сакин дунни республикалул шяраваллавусса халкьуннал цалчинсса субботник.
Му министерствалул прессалул къуллугърал бусаврийну, республикалул цинярда шяраваллаву низамрайн дурцунни ва марцI дуккан дунни паччахIлугърал идарарттал лагмасса, къатрацIухсса, къутаннайсса, ххуллурдацIухсса аьрщив, бувгьунни тамансса мурхьру.
Субботник хьуннин бугьансса мурхьру хIадур бувну бивкIссар министерствалул. Аграрий ведомствалий хьуссар цинярда районнал бакIчитал гьурттусса батIаву, микку ххал бивгьуссар дувансса давурттал масъалартту, мукунма сакин бувссар ми давурттай каялувшиву дуллалисса штаб. Мунил каялувчину увчIуну ивкIссар министерствалул бакIчи Аьбдулмуслим Аьбдулмуслимов.
Шяраваллил хозяйствалул министерствалул зузалт лавгун бивкIссар цинярда шяраваллал районнайн субботникрай гьуртту хьун.
Ва экологиялул акциялул хIакъираву министрнал увкунни:
-Ва субботникрал хъунмур мурадну хъанахъиссар шяраваллавусса ризкьилул фермарду, шяраваллал кIичIиртту, къатрал лагмасса кIанттурду, марцI буккан бувну, санитар нормардал тIалавшиннардацIун бакьин баву, мурхьру бугьаву, кIинтнил даэрдай жулва зузалт ялапар хъанахъисса кIанттурду низамрайн буцаву. Лагмасса тIабиаьт марцIну ядаврил асарду инсантураву чантI учин баву. Жул субботникрал лозунгну диркIссар «МарцIсса шяравалу – марцIсса Дагъусттан» тIисса.
ХIадур бувссар
ХI. Аьдиловлул
