«Алла Ивановнал бивкIулущал щаллусса эпоха лавгссар»

Щалагу Дагъусттаннайх цIа дурксса Гъумучиял школалий зий бивкIсса муаьллимтурая тIисса-тIийнма бикIай. Миннал цIардугу лирчIун дур гьарцаннал зума-мазрайра.КIа школалийн нава дуклан бувкIсса 80-90-ку шиннардийгу ливчIун бия совет заманалул му кьюкьлувасса учительтал, ттунгу бахтти хьуна мукунсса учительтурал дарсирдай щябикIансса. Мукунминнал сияхIрал хьхьичIххуттайсса цану бия Багъдуева Алла Ивановна. Цуксса кьурчIинугу, вай гьантрай лавгунни му дунияллия.

---

Бадрижамал Аьлиева
ТачIав къадакIнийри Алла Ивановнал оьрчI кьюкьин уван­сса махъ увкуну. Ххаллилсса учитель бакъасса, га бия гьарцагу оьрчIал хасият дакIних кIулсса психологгу. Мунил дихьлахьисса химиялул, этикалул ва кулпатравусса оьрмулул психологиялул дарсирдайн жу байрандалийн кунма бачайссияв. Алла Ивановнал дарсирдай бизар хъанахъи­сса, даврихух къалавгсса оьрчI къаикIайва. Химиялул нажагьссарагу дарс къалагайва опыт къабувну, мигу мукун усттарну, мукун за кIулну бувайвахха, жу ссихIирданул дунияллийн багьссаксса шайвав.
1950-ку шиннардий Дагъус­ттаннайн багьсса жагьилсса душнин му чIумал цинмавагу кIулну бакъахьунссия зунттал билаятрая цуппа тачIав личIи къахьуншиву, му цила кIилчинсса ватанну хьуншиву, цила оьрмулул кьадаргу кIиккува лякъиншиву.

Цилла цал духьурчагу дарс дирхьусса, щаллагу дунияллийх кIама бивщусса азара­хъул учениктурал, тарбиялувтурал дакIурдива Алла Ивановна тачIаввагу къабуккантIиссар. Мунил цIа личIантIиссар миннал оьрчIал оьрчIайгу.

Сулайман Маммаев, Дагъусттаннал паччахIлугърал медициналул университетрал ректор:
— Лавгунни жуятува, архсса 50-ку шиннардий Дагъусттаннайн бувкIун, цила бусса оьрму зунттал билаятрацIун бавхIусса Багъдуева (Ушакова) Алла Ивановна. Мунил Гъумучиял дянивмур даражалул школалий ттухьра дихьлай бивкIсса химиялул дарсру ттун тачIаврагу хъамакъаритай. Му бия гужсса педагог. Мунил гьарцагу оьрчIал дакIнивунсса ххуллу лякъайва. Му цилла дарсирдайн муксса дакI тIайласса бикIайвахха, муничIа ккалаккиминнан мунил дарс ххира къархьуну цукунчIав къаличIайва. Дуклаки оьрчIал дунияллиясса кIулшивуртту авадан давривугу, миннан дунияллул халкьуннал культурарду кIулну дикIавривугу Алла Ивановнал дачин дурну бикIайва хъуннасса даву. КIицI лагайва оьруснал чичултран, шаэртуран хас дур­сса вечерду, оьрчIащал бишайва хъинну хIазсса, мунищала архIал кIулшивуртту авадан дуллалисса сценкартту.
Алла Ивановнахсса ччаврил ва хIурматрал лишанну хъанахъиссар му оьрмулул махъва-махъсса ххуллийн тIайла буккан мунил дарс дирхьусса оьрчIавасса чIявуми бучIавугу.

[pullquote]Цилла цал духьурчагу дарс дирхьусса, щаллагу дунияллийх кIама бивщусса азара­хъул учениктурал, тарбиялувтурал дакIурдива Алла Ивановна тачIаввагу къабуккантIиссар.
Мунил цIа личIантIиссар миннал оьрчIал оьрчIайгу.[/pullquote]

Загьидат Будаева, МахIач­къала шагьрулул 9-мур лицейрал, Политехнический колледжрал муаьллим:
— Оьруснал учала бур «Рождение – начало смерти» тIисса. ИкъавчIансса, уттарашиврул щин хIарчIсса цучIав акъар ва дунияллий. Амма Алла Ивановналмур бивкIу ттун ляличIинува кьурчIи бивзунни. Алла Ивановна бия ттул учительницагу, классрал каялувчигу, даврил уртакьгу. Жагьилсса оьрмулий аьпалул хьусса мунил душнищал, Алёнащалгу, ттул хъуннасса дусшиву дикIайссия.
Ттул оьрмулуву Алла Ивановнал хъунмасса кIану бувгьуссар, мунил ттул хьхьичI тIиртIуссар химиялул караматсса дуниял. Ттул нитти-буттан ттуя хIакин хьуну ччай бикIайва, ттунмарив, Алла Ивановнал биялалул, нава так химикну чIалай бияв. Дагъусттаннал университетрал химиялул факультетрайн дуклан буххан бувкIсса чIумал, дулун багьлай бия шанна экзамен, миннувух дия оьрус мазралмургу, тархъансса темалийсса сочинение чичин багьлагьисса. На чирчуссия Алла Ивановнан хас дурсса, нава химикнал пиша циван язи бувгьуссарив бусласисса сочинение.
Алла Ивановнан кIула цимурца – физикагу, математикагу, оьрус маз ва оьруснал литературагу. ТачIав хъамаританссар Алла Ивановнал дачин дурсса классикалул музыкалул кружокгу. Ттун цалчин муниятур лавхьхьусса увертюра цирив, сюита цирив, полькалий, вальсрай къавтIун бизан. Цуппагу хъинну усттарну, куклуну бизайва къавтIун. Жу ссавур дакъа ялугьлай бикIайссияв мунил классрал ссятурдих, ми мукун хIазну, мукун мюнпатну лагайвахха, жу ми байран кьинирдайн тIайла къадарцIуния тIий нигьабувсунгума бикIайссияв.

Кулпатралсса, шанма оьрчIал­ссагу бувну, гайксса давуртту дук­лаки оьрчIащал дуллансса чIун цукун лякъайссияв къакIула.
Алла Ивановна ттухь буслай бикIайва цуппа Дагъусттаннайн цукун багьссарив. Хъунмасса гъирарай ххал дуллай бикIайссияв мунил жагьилнийсса суратру, му бивкIун бия спортсменка-волейболистка, мукунсса бугу-бия, тIайласса чурх, къалип бусса. Ростоврай институтгу къуртал бувну, тIайла бувккун бия Дагъусттаннайн. Шиккугу мунил ЦIуссалакрал район язи дургьуну дия. ЦIуссалаккуй кIул хьунугу бия цила оьрмулул дус Оьмарищал. Махъ Оьмари Гъумукун зун тIайла увккун, Лаккуйн бивзун бия. Алла Ивановна ххарину бикIайва цила душнил душнил Саидал кьадардания, рязину бикIайва мунил оьрмулул ххуллулссану хьусса жула балайчи АхIмад АхIмадовлуя.
Алла Ивановна бия марцI­шиврул, хъиншиврул, инсаннаву, учительнаву дикIан бюхъайсса цимурца ххуймунил эталон.
Сивсуну учин бюхъанссар Алла Ивановнал бивкIулущал щаллусса эпоха лавгссар куну.
Ттула учительницан 82 шин дунугу, ттун му тачIав къабивчIансса кунма, бивчIан къааьркинсса кунма чIалай бикIайва.

Михаил Мудуев, юрист:
— Ттул дуккавриву цIусса дарс – химия ва цIусса учительница – Алла Ивановна хьуннинма жул классрал оьрчIан чIявуну баяйва мунил цIа, мунил дихьлахьисса дарсирдаясса аваза. Му жухьра дарс дихьлан бивкIукун ми цимурца тасттикь хьуна. Му муксса дакIнил хъинсса, иминсса, личIлулсса, аякьалийсса бияхха, на кунмасса хулиганталгума, цанма кIулну-къакIулну, кIукIлу лагайва. Ниттил цила оьрчIаха куннасса гьарцагу оьрчIахасса мунил аякьалул дуван ччисса къавкъинсса къелгума хъамаритан дайва. Бия Алла Ивановна, бия школа.
ЦIана ттун дур 42 шин, Алла Ивановнал ттухь цалчинсса дарс дирхьуния махъ ларгун дур 30 шин. Гужирай макьгу дугьлай, чичлай ура муниясса аьпалул махъру.
ДакIниву цирив ца куртIсса, хъинну агьамсса, хъинну ттюнгъасса ххал рурцунни. Алла Ивановнащал архIал дакIнил ца агьамсса бутIагу лавгунни. Жун, мунил дарс дирхьусса оьрчIан, му мудангу дакIний бикIантIиссар.
ДакIнийхтунусса жижара буллай ура Алла Ивановнал арснахь Ибрагьимлухь, душнихь Верахь, внуктурахь, миннал ирсирахь, АхIмад АхIмадовлул кулпатрахь.