Ларгсса нюжмардий Ма­хIач­къалаллал личIи-личIисса майданнай хьунни Аьра­сатнал Жяматийсса Палаталул сакиншиндарайсса «Сообщество» тIисса форум.Апрельданул 18-нний рес­публикалул жагьилсса ишбажаранчитал бавтIсса майдангу хьунни хъун шагьрулул администрациялул батIавуртту дувай залдануву. Ваний гьуртту хьунни СКФО-райсса президентнал вакилнал хъиривчу Сергей Стариков, АьФ-лул Жяматийсса палаталул вакил Султан ХIамзаев ва ДР-лул жагьилтурал иширттал министр Камил Саэдов.

З. АьбдурахIманова
БатIаврил хъунмур мурадгу бия билаятрайсса, хаснува жулла республикалийсса, бизнесрал масъаларттая ва жагьилсса ишбажаранчитуран хьунадакьайсса захIматшивурттая ва дайшишрур­ттая ихтилатру бансса, цаннал цаннахь кIулмур кIибачIинсса. Ши­кку гьаз бунни хъинну агьамсса ва хIакьинусса кьинилул «цIуцIи кIанттун» ккаллисса жагьи-жу­гьултран давуртту дакъашиврия­сса масъалагу.
— ХIукуматрал хъуннасса къулагъасралу буссар жагьилтал давурттал щаллу баврил масъала. Жула жагьилтал тIурча, ца яла гьунар бусса, маэшат бан ччисса ва му чулухунмай хIарачат буллали­сса, нитти-буттан, кулпатран кумаг бан хьхьичIун ливчусса бур. Жула аьдат­ругу, жула мазругу, культура ва тарихгу буруччаврил ца хIучча вагур – жагьилтал жула Ватандалийва, давуртталгу щаллу бувну, миналул хьун баву. Къапкъазуллал барачат – шиккусса жагьилтуран зун­сса шартIру сакин давривур бу­сса,- увкунни Султан ХIамзаевлул.
Махъру мукунма лавхъунни усру дуллалисса ва ми цайми регионнай машай дуккан дуллали­сса жагьилсса ишбажаранчитурал, теп­лицардаха зузисса фермертурал ва кафе-ресторанну ва салонну тIивтIусса ва му аралуву зун гъира бусса жагьилсса пишакартуралгу. Бия вайннавух, Аьрасатнал кьатIув дуклайгу бивкIун, ххуйсса кIулшивурттащал Дагъусттаннайн зана хьуну, цIакьсса бизнес сакин дан бювхъусса жагьилталгу.
Ахирданий чялишсса гьурттучитуран сакиншинначитурал барчаллагьрал чагъарду ва дакIний личIансса бахшишру дуллуна.