Дугьайсса аьрщи узданну ядан аьркинссар

ДР-лул Россельхознадзорданул Управлениялийн бувкIунни Къизлардал райондалийсса шяраваллил хозяйстварттал аьрщив аьркинсса куццуй ишла къадуллай бур,

Къизлардая Ккардановкалийн дияннинсса хъуру, бакIлахъия дартIун махъ, цIинцI-чапалшивурттахьхьун гьан дурну дур тIисса аьрза. Ва аьрзирай ккаккан дурсса аьрщив ци тагьарданий дурив ххал дан лавгунни Россельхознадзорданул чулухасса комиссия.


Ялув кIицI лавгсса аьрзирай чивчумур тIайласса бушиву исват бунни ДР-лул Экологиялул ва тIабиаьтрал сурсатирттал министерствалул пишакартуралгу. Вай хъуру арендалий ларсъсса ТIагьир ТIагьировлул бувсунни ларгсса шинал 47 гектар аьрщарай къалпузру бувгьуну бивкIшиву. БакIлахъия дартIун махъ хъурунная пленка батIин къавхьуну ливчIун бур. Муния махъ хъуру гъай увкуну, ссуттиллачIа бувгьуну бунагу, полиэтилендалул пленка, кIучI къавхьуну, ялун личлан бивкIун бур.
Сельсоветрал хъунама Ма­хIаммад МахIаммадовлул бусаврийн бувну, пленкардацIа марцI къадурсса участок вайнначIа цамур дакъасса дур.

Аьрщи арендалий ларсманал тахсир бакIрайн лавсунни, бувсунни агьали цимилгу аьрзирдай бувкIун бивкIшиву, амма аьрщи марцI дуккан даву мурад­райсса давуртту чIумуй дан, тIабиаьтрал тагьар даххана шаврийн бувну, къархьушиву.
— ЦIана, гъараллу дакъасса, гьавалул тагьар даркьусса чIун дуссаксса хIаллай, аьрщи низамрайн дуцинсса давуртту дачин дан хIадурну буру, — тIий ур ТIагьиров.
Аьрщарал тагьар ххал дан увкIсса ДР-лул Экологиялул министерствалул пишакар-эксперт Руслан МахIаммадовлул кIицI лавгунни къалпузру бувгьуну бивкIсса Къизлардал райондалийсса сайки гьарца кIанттай укуннасса тагьар душиву.
«Вай аьрщарал тагьардания на цимилгу баян був­ссия райондалул каялувчитурайн, миннул хIакъиравусса жаваб тIурча, ттучIан уттигу къадуркIунни. Полиэтилендалул кьуцурттацIа марцI къадур­сса аьрщив ацIрахъул шиннардил мутталий загьрулул шайссар», — увкунни МахIаммадовлул.

Россельхознадзорданул Управлениялул каялувчинал хъиривчу Карим Каримовлул ДР-лул ТIабиаьт дуруччаврил министерствалул вакилтурая тIалав бунни аьрщарал хIакъиравусса тагьардания чIун-чIумуй баян баву. Ванал мукунма кIицI лавгунни, агрономиялул тIалавшиннарду би­ттур къадуллай, аьрщи ишла дан бюхъайсса тагьардания лаг­лагишиву.
Мунийн бувну, ялув кIицI лавгсса аьрзирал хIакъираву протокол чивчуну бур. Ва статьялийн бувну дагьайсса дур 20 азарунния 400 азаруннийн дияннинсса аьчIа.
Агьалинангу кIулну бикIан­шиврул, баян буллай буру, ДР-лул Россельхознадзорданул хъуннасса къулагъасрайн лавсун бушиву аьрщи низамрайн дуцаврил масъалартту.
Дугьайсса хъуру зия дуллалисса кIанттурду хIисав хьурчан баян бан бюхъайссар ва адресрай: МахIачкъала, Титовлул цIанийсса кIичIиравалу, 3.
Тел.: 8-8722-62-96-36, ягу электрон журалий: rosselhoz-dag@yandex.ru .
Сабрина Къушиева