«Гьунардал дуниял»

Каспийскалий Аьрасатнал халкьуннал аслийсса культуралул центрданий хьунни «Гьунардал дуниял» цIанилусса республикалул выставка.Му тIитIлатIисса шадлугърайнгу, му наниссаксса гьантрай мунийсса суратру ххал дувангу бувкIунни чIявусса инсантал.


Выставка тIитIлай, Центрданул директор Башикар Гадаевал увкуна:
— 2013-ку шиная шиннай Рес­публикалул Халкьуннал творчест­валул къатлул щаллу дуллай бур «Самородки» цIанилусса проект, цил лагрулийгу дуллалисса цайнува цивппа хьусса художниктурал выставкартту. Уттинин дур­ссар Башир Увайсовлул, Анвар Саэдовлул, Светлана Иранпурдул, Ссугъури Увайсовлул, ХIажи Ссунгъуровлул ва цаймигу художниктурал выставкартту.

2018-ку шинал ахирданий Рес­публикалул Национал библиотекалий хьуссия цачIусса «Гьунардал дуниял» тIисса выставка. Муний цал архIал ккаккиялун дирхьуссия 27 художникнал суратру. Выставка хьуна хъинну ярг­сса. Мунияту пикри був­ссар 30-35 суратрая сакин хьусса выставка дувансса, цувгу республикалул цайми шагьрурдайн ва районнайн диянсса, шайссаксса чIявусса тамашачитуращагу ккаккан бю­хъаншиврул.

Дагъусттаннай чIявур цайнува цивппа хьусса, цанна-цанна хасъсса «симанну» дусса художниктал. Мунищала архIал ми циняв ссавурив кувннаха кув лав­хьхьуссагу бур. Миннал творчествалул агьаммур теманугу бур Дагъусттан, цила ранг-рангсса тIабиаьтращалсса, виричусса тарихращалсса.
ДакI ххари хъанай дия ва выставкалийн чIявусса жагьилтал, дуклаки оьрчIру бучIаврия.

Бадрижамал Аьлиевал