[dropcap]М[/dropcap]артрал 21-нний Каспийскалий, Дагъусттаннал машинартту баврил ва сервисрал колледжраву, хьунни Армиялийн нанинал кьини. Муний гьуртту хьунни шагьрулул бакIчинал хъиривчу Людмила Левицкая,шагьрулул аьрали комиссар Геннадий Кьурбанов, аьрали комиссариатрал призывралмур отделданул начальник Мухтар Аьлиев, колледжрал директор МахIаммадрасул Муслимов, студентътал.
Уттигъанну Каспийскаллал шагьрулул военкомну ивтсса жула лаккучу Геннадий Кьурбановлул (КIундиннал шяравасса) цалва ихтилатраву кIицI лавгунни жагьилтуран аьрали бурж лахъаврил хъуннасса агьамшиву душиву, мунил жагьилтурал чурххал кьуват ва дакIнилмур хIал цIакь байшиву. Ванал мукунма бувсунни чIярусса шиннардийсса къуллугърал тарихраву ххаллилну къуллугъ буллай бивкIсса Дагъусттаннаясса жагьилтурая.
МахIаммадрасул Муслимовлул бувсунни республикалул техникалул цалчинсса дуккаврил идаралул хьхьичIунсса выпускниктурая, миннавухсса цагу – дунияллул даражалийсса аьлимчу-физик Амир Амаев, цалгу дяъви байбивхьусса 1941 шинал 22-сса кьини ва идаралул выпускникнал диплом кIунттил бувгьусса. Уттисса студентътурайн оьвчаву дунни, уку-укунсса инсантурал цIардая пахрулий, миннан лайкьну къуццу тIун.
ХIадур бувссар
Бадрижамал Аьлиевал
