[dropcap]О[/dropcap]ьрчIал луттирдал нюжмардул лагрулий хьунни личIи-личIисса чичулт­рал, шаэртурал творчествалун хас дурсса вечерду, хьунабакьавуртту.

Бадрижамал Аьлиева
[dropcap]М[/dropcap]артрал 22-нний Дагъус­ттаннал Ссихьрал театрдануву хьунни «ОьрчIал ва чIава жагьилтурал луттирдал нюжмар» дайдихьлахьисса шадлугъ.
Луттирал шадлугърайн наними хьунабакьлай бия Мойдодыр, Аьжужа-Къари, Кащей ва литературалул цаймигу персонажру. Ва кьини театрданул сахIналийн бувккуна кувннаяр кув гьунарду ххисса оьрчIал коллективру, чIава балайчитал ва къавтIалт. ОьрчIал луттирал байран барча дуван бувкIун бия шаэртал ва чичулт.

Луттирал нюжмардул му­тталийсса гихуннайми шадлугъру хьуна Н. Юсуповлул цIанийсса Республикалул ОьрчIал биб­лиотекалий. Ми хьуна личIи-личIисса цIардалу: «Творчествалул щаращи кьакъакьай­ссар», «Литературал дилижанс», «Хъинсса шеърирдал ва хавардал жазира», «Театр – карамат­рал ляличIиссара дуниял» ва м.ц.
Театрданул шинан ва СССР-нул халкьуннал актриса Барият Мурадован 105 шин шаврин хас дурсса шадлугъравух гьуртту хьуна МахIачкъала шагьрулул 46-мур, 39-мур, 17-мур школар­ттал дуклаки оьрчIру ва миннал муаьллимтал, Дагъусттаннал Театрдал музейрал хъунмур Лилия Жамалуттинова. ОьрчIан ва кьини кIул хьуна Дагъусттаннал театрдал тарихравасса чIявусса затру.

Щаллагу дунияллий кIицI лагайсса Поэзиялул кьинилун хас дурмур шадлугъравух гьур­тту хьуна шагьрулул 59-мур ва 60-мур школарттал байбихьулул классирттал дуклаки оьрчIру ва миннахь дарс дихьлахьими. ОьрчIан кIул хьуна Поэзиялул кьини дуккан дуршиву мартрал 21-нний 1999-ку шинал Франциянаву. ОьрчIал гъирарай вичIи дирхьуна Нураттин Юсуповлул чивчусса магьлух.

Гихунмай оьрчIал «литературалул дилижансрай» дуруна мукьра-ххюра ликказан: Кьиблалул Американал зуманив – ми­ккуяхха жазиралия ликкан увну ивкIсса, махъ щаллагу дунияллун кIул хьусса, мукьра шинаяр ххишаласса хIаллай микку цувалу ялапар хъанай ивкIсса, Даниель Дефол луттирал, «Робинзон Крузо» лу­ттирал геройнал прообразну хьусса инсан; 19-мур ттуршукулул Американал зумардай, Марк Твеннул ва цайминналгу геройтурачIа; Г. Х. Андерсеннул «Марххалттанул паччахI-бика» чIалъаьрдачIа. Мукунма хъунмасса гъирарай оьрчIал вичIи дирхьуна луттирдая-юбиляртурая бусласисса хавардах.
Нюжмардул лагрулий хьунни личIи-личIисса чичултрал, шаэртурал творчествалун хас дурсса цайми-цаймигу вечерду, хьунабакьавуртту.