«Лакмузин» инструментращал
[dropcap]И[/dropcap]тникьини Лакрал театрдануву хьунни Дагъусттаннал лайкь хьусса артист, машиностроитель, промышленностьрал зузала, журналист МахIаммад Хавчаевлун 80 шин шаврин хасбувсса аьпалул мажлис.
Зулайхат Тахакьаева
МахIаммад дакIнийн утан бувкIун бия дустал, гьалмахтал, даврил уртакьтал, гъан-маччами. Муний гьуртту хьунни Дагъусттаннал опералул ва Лакрал театрданул, паччахIлугърал филармониялул артистал, Дагъусттаннал халкьуннал инструментирттал оркестр, оьрчIал къавтIаврил ансамбллу «Ссалам» ва «Щунудагъ».
Мажлис бачин бувну бия Муслим Хавчаев ва Дагъусттаннал халкьуннал артистка Саният Рамазанова.
МахIаммад Хавчаев дакIнийн утлатисса ихтилатру бувна Дагъусттаннал Композитортурал союзрал хъунама Рамазан Фаталиевлул, Музыкантътурал союзрал хъунама Хан Башировлул, «Дагъусттан» ВГТРК-лул хъунаманал хъиривчу Ссалам Хавчаевлул, опералул театрданул хъунама дирижер Николай Бабичевлул, шяравучу Сулайман Мусаевлул, Дагъусттаннал халкьуннал артист Мутай Хадулаевлул, ванащал архIал зий бивкIсса МахIаммад ХIажиевлул цIанийсса заводрал ва Дагъусттаннал опералул театрданул зузалтрал.
Цинявппагу кIицI лаглай бия МахIаммад Хавчаев ивкIшиву гьунарду чIявусса, дакI марцIну зузисса ва хьхьичIунсса зузалтрал сияхIрай ивкIсса инсан.
Ванал гьунардава хьхьичIххуттайн ласлай бия ванал цала бувсса инструмент «Лакмузин». Ва инструмент цуппагу бур оьруснал балалайкалул ва италиянал мандолиналул куц хIала бувхсса.
Ва инструмент хIакьину тIалавну бушиврул барашиндаран машгьурсса музыкант Амрет ХIусайнаевлул щаллу бувна лакрал халкьуннал попурри. МахIаммад Хавчаевлул гьунардал барашинна дуллай бур ванал итабавкьусса шеърирдал жужралгу. МахIаммад тамансса шиннардий зий уссия «Илчи» кказитрал корреспондентнугу.
Гъан-маччаминнал цIания МахIаммад Хавчаев дакIнийн утан бувкIминнахь, аьпалул мажлис хIадур бувминнахь, гьуртту хьуминнахь барчаллагь увкуна ссурахъу Нурислан Хавчаевлул.
