[caption align="aligncenter" width="1200"] 8-мур цехрал зузалт[/caption]

М. ХIажиевлул цIанийсса МахIачкъалаллал заводрай лакрал зузалтрал сайки щаллусса цех бур. Цийн патриарх учин бучIисса му заводрал чIиви-хъунсса тарих чивчусса инсанталну хъанай бур 8-мур цехраву ччянива шинмай зийнма­сса захIматчитал.

ХIасан Аьдилов [dropcap]Н[/dropcap]а хьунаакьин заводрал хьулухун увкIуна цIанасса ппур­ттуву 8-мур цехрал хъунаманал буржру бартбигьлагьисса Рашид Кьурбайтаев. Цехрал хъунаману зий усса ия Ваччатусса Шяпи Увайсов. Рашид Кьурбайтаев зий ур Увайсовлул хъиривчуну. Ва Ккулатусса ур. Бувккуну бур Каспийскаллал профтехучилище, слесарь-ремонтникнал пиша бур ванал. Муния махъ, 18 шинай аьралуннаву къуллугъ буллайгу ивкIун, пенсиялийн ув­ккун махъ увкIун ур заводрайн.

Аьвдуллагь Дибиров зий ур цехрал мастерну. Ванал заводрай зий хьуну дур ххюцIаллийхъайсса шинну.

[caption align="aligncenter" width="680"] Аьвдуллагь Дибиров[/caption]

Муххал усттарну зий ур Аьвдуллагьлул арс Шамилгу. Аьвдуллагь ур Кьубиял шяравату­сса. БакIрайва га зий ивкIун ур Каспийскалий «Дагдизель» завод­рай. Яла, Армиялия зана хьувкун, зун ивкIун ур  ва заводрай.

Цехрал ца жаваблувсса зузалану хъанай ур Карашату­сса СулайманхIажи ЧIанкIуев. Ванал пиша бур штамповщикнал. Буттащал архIал зий ур арс ХIусайнгу, крановщикну ва слесарьну.

Цехраву зий бур жула кIива лакку хъамитайпагу - Сум­батIлиясса Атаят Щамххалова, ва Буршаятусса Светлана Чупанова.

Гьуйннал шяраватусса Ма­хIаммад Жабраилов зий ур мах кьукьуну.

Вайннал ттухьва бувсмунийн бувну, заводрал аргъ ду­сса чIумал, 8-мур цехраву зий ивкIун ур 172 инсан – 6 бригада штамповщиктурал, 6 бригада муххал усттартурал, 3 бригада слесарьтурал. Зий бивкIун бур 2 чIумух. Ххинугу бартдигьлай бивкIун бур ккаккан дурсса планну. Цехраву буллай бивкIун бур 6 цIа дусса журалул жамирдал бутIри. Буслай ур цехрал мастер Аьвдуллагь:

- Жул цехраву бувсса бутIа бакъасса цавагу хьхьирил жами бакъассар. Заводрал дуккан дайссар мукунна 7 журалул насосругу.

ЦIанасса ппурттуву зий бур 1 бригада штамповщиктурал ва 1 бригада муххал усттартурал. Жул даву захIматсса дур, харжругу захIматраха лавхьхьу­сса бакъар. ХъунмурчIин зийгу бур заводрал ветерантурал арсру. ЦIусса зузалт заводрайн най бакъар. Директор хIарачат буллай ур заказру лякъин. ЦIана цIусса завод буллай буссар Уйташлив, 1 цех бувну бур, ваймигу бувну чулийн бувккукун, тихун бизан бантIиссар».

ЦIанагу заводрал бартдигьлай бур ВПК-лул (Военно-промышленный комплексрал) заказру, амма ми лап чанну дур. Аьркинну бур программистътал, цIусса техникалий зунсса, ттизаманнул технология ишла дуллан кIулсса жагьилсса пишакартал.