[dropcap]В[/dropcap]ай гьантрай ЦIуминалийсса Шушиннал школалий хьунни 11-ми классирттал дуклаки оьрчIал дянивсса ниттил мазрай пасихIну назмурду дуккаврил конкурс.
Конкурс кIицI лаган ххуйсса хIадуршинна дурну дия школалул каялувчитурал.
Гьуртту хьун бувкIсса оьрчIру школалий хьунабавкьуна балайрду-къавтIавурттащал. Залданувун бавтIун махъ, циняв хIала бувххун, увкуна Лакрал гимн. Ихтилатру бувна школалул директор Шакират Шарапуттиновнал ва лакку мазрал учитель Умамат Исяевнал.
Цинявппагу школарттаясса 11-ми классирттал оьрчIал дурккунни цала хIадур дурсса назмурду. Жюрилул хIасиллайн бувну, 1-мур кIану бувгьунни ЦIуссалакрал школалул дуклаки душ Ш. Кьурбановал, 2-мур кIану бувгьунни Гьамиящиял школалиясса А. Аьзиевлул, 3-мур – Шушиннал школалул дуклаки душ М. Исяевал. Ххув хьуминнан бахшишру дурну махъ циняв бавтIуна авадансса ссупралухун. Дуклаки оьрчIал увкуна хьхьичIавасса халкьуннал балайрду.
