Уттигъанну на, аьрххи багьну, кIия ссурахъищал Избербашрайн лавгун, гайннал чIиви машиналий зана хьуну най уссияв. Манасрал мукьбачIулийн бивсса чIумал, жул янилун дагьуна ххуллул лултту чулий аьшвашханалул хьхьичI дирхьусса пущу-пуркIу тIисса «чяй хIачIан нанияра» тIисса самовар. Гьай-гьай, жун ччан бивкIуна самовардануву дурсса чяй хIачIан.

Дяркъусса кьинигу духьувкун, жу, кьатIув щякъабивкIун, аьшвашханалувун бувххун, гиву жувалусса кабиналуву щя­бивкIссияв. Га кабиналул чIирттайн лачIун бувсса чагъардугу ттун хъинну ххуй бивзуна. Гайннуй бивхьуну бия Рим шагьрулул колизей, Пизан шагьрулул багьлагьи къала ва цаймигу суратру. Кабиналувун бухлахи­сса кIанугу, кIалан бучIан бувну,  хъиннура сий дусса бия. ХIасил, чяй ларсун бучIаннин дакIнил макьу ххуй дуллай дия.

Яла лавсун бувкIуна официант азирбижаннал армут стаканну. «Армут стакан» тIисса махъ хъюрт тIиссар, стакан хъюртуха лавхьхьусса бухьувкун. Амма стакандалулу дакъая бушкъапру. На кIицI бувссия Дарбантливсса чяйханарттаву укунсса стаканнал лув бушкъапру дишайшиву. Стаканнаву мукунна дулай гийх 30-40 грамм марцIсса щиналгу, чяй хIачIлачIиманал га цалагу вилаганшиврул. Гай щин рутIингу столданий дирхьуну дикIай  тIутIив дишай лагрулул вивалу къачIалачIисса ваза. Укунсса иширттайн учайсса ххай ура сервис куну.

ДуркIуна бушкъапру. Лавсун бувкIуна качар, цивппагу, кьацIливу бишайхту, га цIана бассайми. Душ бацIан бувну, на ганихь бувсъссия чяй гъавгъсса, кьянкьасса качарданухун хIачIайшиву. Амма га жух махIатталну буруглай бия. Мунияту жу учIан увссия аьшвашханалул заллу. Жу ганахьгу кIицI бувссия чяй хIачIайшиву гъавгъсса, кьянкьасса качарданухун, ми цивппагу бахлай бушиву 90 къурушран ца пачкану циняв ттучаннай. «ТтучIа бакъар мукунсса качар. Утти бучIаннин ласунна», — куна. БувкIуна яла чяй ларсун жул душ. Агь, вил къаттай, гай цирдагу дия кIюласса  гацIана бя­къайсса муххал чяйникIраву. Чяй дикIан аьркинссар чинилул чяйникIраву. Дарбантлив мукун дикIай. Цал чинилул чяйникIру вилавгун щаращисса самоварданувасса щинай, дичай гивун аьркинссаксса чяй. Яла рутIай самоварданува щаращисса щин. Яла дишай ттукIрай, газрай зузисса муххал хъуннасса плита дусса пачлил ялув. Гикку чяй гьаз хъанай кьалакьулун дияйхту (чяйханщикI кьалакьив гьаз дуллай уруглайнари усса), дуркьун, чяйникрал лув бушкъапгу дирхьуну, муштаритурал столданий дишай. Дарбантлив чяйханарттавусса официантътал арамтал бикIай. Хъамитайпа нажагь бакъа къабикIай. Чяйлух­сса арцугу гиккура чяйникIрал чIарав дирхьуну, чяй хIачIайхту, лагайссар муштаритал. СССР дусса чIумал мукьва ва бачIи армут стакан лагайсса чинилул чяйникI 20 кIапIикIран бикIайва. Бунияласса индиянал чяй ччай духьурча, ина аьркин­ссия, чяйханщикIначIан гъан хьуну, ца къуруш дулун. Му къуруш дулаву шайва хIурмат буван ччисса хъамаличунащал чяйханалувун лавгсса чIун. Дарбантуллал чяйханардаву кунна, тачIав ттуща шарда гукун нахIусса чяй дуван къархьу­ссар. Чяй даврил духьунссар цила кьюлтIшивуртту.

ЖучIан Манасрал мукьба­чIулий ларсун бувкIсса «хьюмушиву» чяй дакъаяча, ди­ссин дия, дахьра рангсса. Ттун бувчIуна жува бяйкьуну га аьшвашханалувун бакIрайн багьшиву. Манасрал мукьбачIулийсса аьшвашханачитал, самоваргу ххуллул чIарав дирхьуну, инсантал хъяврин буллай бушиву. ЧяйлуцIа дия кIул дакъа­сса кьанкь. Укунсса кьанкь дусса чяй дикIай дахлай ттучаннай. Мунил тIиссар лув дагьсса чяй машлуй гьаншиврул кьункьал уртту дирчуну гай дахлай душиврия. Жу чяй, ца-ца ссипI куну, кьадиртссия.

Жува чяйлух ялугьлай бивкI­сса кабиналул чIирттайсса Италиянал суратругу ттун къаччан хьуна. ХIасил, зу зунма ччимур бувара. Ччарча, хIачIияра, къа­ччарчагу, махIачIару Манасрал мукьбачIулийсса самовардануву дурсса чяй. Навама ххишала ги­ккун гъан къахьунна.

Лажин хIадур дурссар ХIажимурад ХIусайновлул