Хъамакъабитансса мажлис хьунни «21 век» тIисса банкетру бай залдануву, ЦIуссалакрал райондалул бакIчи МахIаммадхIажи Айдиевлул сипталий. Мажлисрай лахъа-хъун буллай бия Дагъусттаннал ва республикалул кьатIувсса вузру ЯтIул дипломрай къуртал бувсса ва цIанасса чIумал ххювардай дуклакисса райондалул школарттал выпускниктал.
Андриана Аьбдуллаева
Декабрь зурул ахирданий райондалул бакIчинал укуннасса тагьарданий бахшишру дурссия райондалул школарттайсса дуккавриву хьхьичIунсса 500 оьрчIан. Школа медальданий къуртал бувсса 25 выпускникнан бахшиш дурссия каний дахIайсса мусил ссятру.
Цимирагу шинни ЦIуссалакрал райондалул ва аьдат дуллай. ЦIуссалакрал район савав хьуну, укуннасса давуртту дуллан бивкIунни цайми районналгу. Райондалул бакIчи мудангу хIарачат буллай ур оьрчIавун дуккаврихсса гъира бутан. Муниятугу бухьунссар ЦIуссалакрал райондалиясса оьрчIал гьар мудан хьхьичIунсса кIанттурду бугьайсса личIи-личIисса конкурсирттай ва олимпиадарттай.
[dropcap]О[/dropcap]ьрчIру барча бан, вайннал кьини хъун дан бувкIун бия Дагъусттаннал БакIчинал администрациялул ва ХIукуматрал Управлениялул хъунама (паччахIлугърал къуллугърал, кадрардал ва наградарттал масъаларттаха зузисса) Артур Исрапилов, Халкьуннал Мажлисрал председательнал хъиривчу Камил Давдиев, Халкьуннал Мажлисрал депутат Амирхан Амирханов, жагьилтурал иширттал министр Камил Сяидов, Лакрал райондалул бакIчи Юсуп МахIаммадов, Ккуллал райондалул бакIчи Шамил Рамазанов, МахIачкъала шагьрулул Кировский райондалул бакIчи СалихI Сагидов.
Мажлисрайн оьвкуну бия оьрчIал нитти-буттайнгу.
— Жул хъуннасса вихшала дуссар зуяту райондалулгу, республикалулгу билаятралгу цIа бюхттул дансса инсантал хьунссар тIисса. Нагу хIадурссара уттиния тихунайгу зул чIарав ацIан, ттущава шайсса кумаг бан, — увкунни райондалул бакIчинал, оьрчIру барча буллай.
ЯтIул дипломрай вузру къуртал бувсса 14 оьрчI-душнин дуллунни кьу-кьуазарда къуруш, ххювардай дуклакисса 16 студентнан – ацI-ацIазарда къуруш. Бахшишру ласун оьрчIру буклай бия нитти-буттащал.
Мажлисрал сий хъиннура гьаз дурна Дагъусттаннал эстрадалул машгьурсса артистуралгу.
