Лайкь хьунни хьхьичIунсса кьиматран

Вай гьантрай МахIачкъалалив шадлугърал даражалий кIицI ларгунниДагъусттаннал халкьуннал театрдал фестиваль. Фестивальданий лавайсса даражалий цала магьиршиву ккаккан дунни ЦIуссалакрал райондалул халкьуннал театрданул коллективралгу.

Лакрал миллатрал хьхьичIа­расса язими яннардугу ларххун, авадансса лакку дукрардал ххункригу дурцIуну, зюннав-дачIулухун балайртту тIий, къавтIавуртту дуллай, сахIналий цила дикIайкунсса хъарас щаврил аьдат ккаккан дунни коллективрал. КIива-шанма миллатрал инсантал ялапар хъанахъисса райондалий  бигьанугу бакъахьунссар лакрал миллатрал аслийсса аьдатру ядан ва  дуру­ччин. Му чулуха хъуннасса хъар ларсун най бур цIуссалакрал творчествалул коллектив.

Фестивальданул жюрилулгу лавайсса кьимат бивщунни вайннал магьиршиврун. ДР-лул халкьуннал артист Алексей Тимохиннул кIицI лавгуна ЦIуссалакрал райондалул коллективрал ляличIинува  тяхъа-шад  буккан бувшиву тамашачитал. «ЧIалай бур зул райондалий фольклор, аьдат-эбадатру, культура яхьуну душиву. Лайкьри ва аьдат Кремлилул сахIналийгума ккаккан дуван», — увкунни Алексей Тимохиннул.

Фестивальданий тамашачитурал  ххарину кьамул унни Дагъус­ттаннал лайкь хьусса артист Арслан Шагьмарданов ва Дагъусттаннал халкьуннал артист Шамсуттин Къапланов.

Шиккува кIицI лаган, ЦIу­ссалакрал творчествалул къатлул коллективрал  уттинингу, республикалул сахIналий цалла  магьиршиву ккаккан дурну, цимилгу хьхьичIунсса кIанттурду бувгьуссар.