Цалчин барча учин ччай ура дуснахь 75 шинал юбилей. Ми шинну чIяруссаривкьай, чанссарив? Ссапар кунасса инсаннан, дустуращал дусшиву дан кIулсса, миллатрал гьарицагу даймунивух даингу хIаласса, Лакку кIанттуй дакI аьтIисса, мюхтажминнах аякьа дусса инсаннан, ми хъинну чанссар.
Ссапардущал жу кIул хьуссару 1965-66 шиннардийва. Мунияр махъсса жул дусшиву, хъиннура цIакь хьурча дакъа, кулпатирттащалва дус хьурчан дакъа, лагь къархьуссар. На хъинну ххаринугу икIара Ссапар кунасса дус ттула оьрмулуву уну тIий.
Ва цувагу ур дусшиву дуруччин кIулсса инсан, дустал лагма лаган бан мудангу хьхьичIунсса инсан. Цува зузисса ДР-лул Жяматийсса Палаталул членну усса чIумалгу, хъунаманал хъиривчуну увчIуну махъгу, ва мудангу хIарачатрай уссар, Лаккуй ва шагьрурдай дуллалисса агьамсса давурттал иширттал чIарав авцIуну, ххуй-ххуйсса мурадру бартбигьин маслихIат, насихIатрайну бикIу ка кIидахIаврийну бикIу.
Палаталуву ванайн багьайссар строительствалул ва ЖКХ-лул масъалартту. Мигу щаллу бувай ванал, куртIну пикри бувну, вив увххун.
«Илчи» кказит буккан буллан бивкIния шинай ва ур редколлегиялул членнугу. Гьарца редакциялул дуллалисса давриву уссар мудангу хьхьичI ххуттай. Занная цанма бивсса кьисматрая гьарцагу аьркиннал чIарав ацIай, ка-кумаг бувай.
Жун, дустурангу цинявппа лакрангу Ссапар акъа чара бакъассар, цув ттигу чIярусса шиннардий цIуллу-цIакьну итаннав Заннал!
Сиражуттин Илиясов
