Къатлувугу, дакIурдивугу лавхъунмасса чани

Шамххалов Серегин

Ккуллал райондалий яхъанахъисса инсантал чаннал щаллу баврил ялув бавцIуну бур Ваччавсса подстанциялул зузалт. На хьунаавкьуссияв Ваччавсса подстанциялул хъунама мастер Шамхалов Серегин Аьвдулхаликьлул арснащал.

— Жуяра нанисса шинал ци-ци давурттив дуван бювхъур? – цIухлай ура Серегиннухь.
— Ккуллал райондалул шяраваллавусса ххаллу, мукунна райондалийн нанисса токрал ххаллу, тталлу бур нава аннинмасса (1972-ку шинал). ЧIярусса шиннардий вайннух буруглай бивкIун бакъар.Вай вайксса шиннардил лагрулий хухна хьуну, чани ххи шайхту, ххаллу руцлай дур. Мунийн бувну жу цал шикку подстанциялийсса 4 мигаватрал трасформатордануцIун бишарду 1.6 мегаватрал трансформатор. Даххана дуварду Вихьуллал, Ссухъиящиял, ЦIуйшиял шяраваллавусса чIяруми ххаллу, цIусса къабиширчагу, бишарду трансформаторду. Утти вай шяраваллу чаннал чулуха, лекъашлай дузалну дуссар.Амма, винмагу чIалай бурхха, гьашину ссуттил дурагу гъараллу дакъая, къабувунни марххалагу. Мунияту, неххардий щин чанну дусса чIумал, Гергебеллал (чани жучIанма гихар нанисса) электростанциялул турбинартту дузалну зун къабикIайссар. Гиха бучIан аьркинссаксса чани нан къабикIай. Ялагу жучIанна дуссар Агъуллал чулуха нани­сса чаннал ххаллугу. Гергебеллал электостанциялия дузал буван къахъанахъимур чани Агъуллал чулуха щаллу байссар.

Чаннал зузалтрал аьмсса сурат

Даххана дуварду Ккуллал чулухуннай нанисса 10 киловатрал гужшиву духIан шайсса ххаллу. Шиккува баххана буварду 35 ттала. Вай бия 1965-ку шиналва бивщусса тталлу. ХIасил, циняв кIицI къадулларчагу, чIярусса давуртту дуварду. Дуванссагу чансса дакъар
На Серегиннущал ихтилат­рай унува кабинетравун увххуна ЦIуйшиял шяраваллил каялувчи Мадаев Малик. Малик рязину ия Серегиннул зузалтрая. «Дуван аьркинмур, лахъи лаган къадуллай, дувай вайннал» — куна мунал.

— Жула ихтилат ЦIусса шинал дайдихьулий хъанай бухьувкун, на барча джуллай ура циняв Ккуллал райондалул жяматрахь, лакрал миллатрахь цIусса шин. ЧIа тIий ура кулпатирттаву паракьатшиву ва муданмагу къатлувугу, дакIурдивугу лавхъунмасса чани, — куна чаннал жаваб дулайсса къуллугърал чувнал.
Ганияр махъ ссупралух шя­бивкIсса Ккуллал райондалул подстанциялул зузалт на барча бувссия байрандалущал. ЧIа увку­ссия Ильичлул жунма буллусса чани мудангу лавхъна битансса цIуллушиву вайннан.