Декабрьданул 17-нний ДР-лул БакIчи Владимир Васильевлул дунни республикалул законну дуккан даврил, ми бартдигьаврил ва муниципал органнащалсса батIаву.
Муний ххал диргьунни 2018 шинал законну бартдигьаврил органнал давурттал хIасиллу ва 2019 шинайнсса масъалартту.
Цалчин махъ лавхъунни ДР-лул экономикалул ва территориярттал лябуккулул министр ХIусман ХIасбулатовлул. Мунал бувсунни «ЗахIматрал лябукку ва зузи кIанттурду дузал баврин кумаг баву» тIисса национал проектрал лагрулийсса конкурсрай жулла республика кIилчинмур ятIапрайн дурккун душиву. Мунал бувсунни мукунма «100 школа» тIисса проектрал лагрулий дурсса давурттая.
[dropcap]Ш[/dropcap]яраваллил хозяйствалул захIматкашнал дурсса ва дуллалисса давурттая бувсунни шяраваллил хозяйствалул ва бакIлахъиялул министр Аьвдулмуслим Аьвдулмуслимовлул. Мунал тIимунийну, циняв журардал хозяйствардаву ларсун дур 132,1 млрд. къурушрансса бакIлахъия, лябуккулул индекс бур 101,1%, му дянивну ларсъсса Аьрасатнал даражалул ккаккияр.
ДР-лул ХIукуматрал председательнал хъиривчу – аьрщарал ва хъуслил арардал министр Екатерина Толстиковал бувсунни цила каялувшиврий зузисса идарарттал давурттал хIакъираву.
ДР-лул ХIукуматрал председательнал хъиривчу – дуккаврил ва элмулул министр Уммупазил Оьмаровал бувсунни республикалул школарттайсса ва оьрчIал садикирттайсса тагьардания. Мунил тIимунийну, ялунчIил федерал бюджетравату дучIантIий дур республикалул школарттал ва оьрчIал садикирттал иширттан 1,5 млрд. къурушрал. Мунияту 2019 шинал цIуну бан ккаккан бувну бур 32 оьрчIал садик. 2021 шинайннин школарттай шанна чIумух дарсру дишаврил система къаличIантIиссар.
Республикалийсса строительствалул ва ЖКХ-лул давурттая бувсунни мунил министр Малик Багълиевлул. Транспортрал ва ххуллул хозяйствалул иширттая бувсунни му ведомствалул каялувчи Ширухан ХIажимурадовлул. Ихтилатру бунни мукунма ДР-лул промышленностьрал ва энергетикалул министр Сайгидпаша Оьмахановлул. Мунал тIимунийну, гьашину газ буцинтIиссар 12 шяравун.
Ихтилатчитурал бувсмунил хIасиллу дуллай, Владимир Васильевлул кIицI бунни дуллалисса давурттал мюнпат ялу-ялун гьарза хъанан аьркиншиву ва масъалартту дузал баврил лябукку чIалан аьркиншиву.
ХIадур бувссар
ХI. Аьдиловлул
