Ишру байбихьлай бур Дагъусттаннал зунттал ца шяраву

Ларгсса нюжмардий республикалул журналистътурал аьрххи, «Пальмира» тIисса кинофильм ласласаврицIун бавхIуну, аьвзалзаманнул Дарбантливсса бия. 

Жу тиккун бив­сса чIумал, кино ласласавугу най дия шагьрулул бухзаманалул махIлалийсса хьхьичIавасса хIаммамраву.

---

[dropcap]В[/dropcap]а фильм хIадур дуллай бу­сса бур 2004 шиная шинмай, Аьра­сатнавугу, мунил кьатIувгу жула автортурал кино машгьур дуллалисса Proline Film тIисса кинокомпания. Ва киностудиялул гьану бивзссар чIявусса машгьурсса режиссертуращал зий ивкIсса Андрей Сигле тIисса продюсернал. «Пальмира» фильмрал соавтор ва режи­ссергу ур халкьуннал дянивсса хьхьичIунсса кинофестиваллал гьурттучи ва лауреат Иван Болотников. Сценарийгу чивчуну бур кинофестиваллал лауреат, хьхьичIунсса наградарттан лайкь хьусса Константин Лопушанскийл.
Кинофильмрал цалчин­сса съемкарттугу дайдирхьу­ссар ноябрьданул байбихьулий ХъахIабросо тIисса жула зунттал шяраву. Ванил мяъна-мурадгу бавхIуну бур цIана жула ца яла цIурювкьусса, сайки гьарцагу жула жяматирттайн, тухумир­ттайн щусса дяъвилул, терроризмалул ва экстремизмалул масъалалуцIун.

Ишру байбихьлай бур Да­гъусттаннайсса ца хъун дакъа­сса зунттал шяраву ялапар хъана­хъисса Артур тIисса хIакиннал къатта-къушлий. Щарссагу диркIуну, цувалу ливчIсса адаминан багьлай бур цала ца бакъа-бакъасса душ тарбия буллан. ЧIун най, оьрму наниссаксса, чIявусса затру бакIрачIан букIлай бур. Кьинирдал ца кьини буттан баллай бур цала бакъа хьусса душ, Сириянавун лавгун, ИГИЛ-данул кьюкьравух бусса бур тIисса хавар. Гьарзатгу ду-дуний кьариртун, ссалчIав пикригу къабувну, ппу душ хха­ссал бан ачлай ур цанма бувагу къакIулсса билаятрайн.

Режиссернал бусаврийну, кинофильмрал чIявуми сюжетру, Сириянавур тIий, лавсун бур жулла республикалий.
«Дарбант цуппава тарихрал ва бунияласса иширттаясса кинофильмру ласлан ляхъан був­сса шагьру хханссар. Шикку декорация тIисса цичIаврагу ишла дан багьлай бакъар. Гайва аьвзалзаманнул къалалул хъахъи чIиртту, махIлардайсса къумасса кIичIиртту, лухIи-пурщисса халкьуннал симанну. Гьарзат дур жун аьркинсса куццуйсса», — буслай ия съемкарттал дя-дянихсса пресс-конференциярттай режиссер.
Жу бувкIсса кьини ласласи­сса сюжетгу най бия Бестужев-Марлинский яхъанай ивкIсса къатлул чIаравсса Арамтурал хIаммам бивкIсса аьвзалзаманнул кIанай. Ва бия, чурттурдайх бувчIун, аьрщарал вив кунмасса, тивун-шивун буххай­сса, лувчIинну бусса кIану. Дя-дянихсса чIирттува бия сайки ца метралул уттасса, бухзаманалул диц-куц яхьусса.

Вивгу аьжаив­сса пахъдагьру ва кьутIлатIисса дяркъу дия.
Так, «Внимание…камера…мотор!» тIисса, режиссернал лахъсса чIунил жу жуйнма жува бучIан бувну, ццах учин байвав.
Иван Болотниковлул бусаврийну, ва фильм ласунсса багьанану хьуну бур цаппара шиннардил хьхьичI жула Дагъусттаннай хьуну бивкIсса иш. Ва иширая­сса сюжет ккаккан бувссия билаятрал телеканаллайгу. Мунивух бувсуна Сириянавун, цила шанма душгу бувцуну, лавгсса хъамитайпалия ва душваврал хъирив лавгсса буттая ва ми хха­ссал буллай, мунал бакIрачIан бувкIмуния. Щарсса махъуннай зана хьун рязи къашайхту, бу­ттал букъав къабивтун бия душру сагъ-саламатну Ватандалийн буцин.

Режиссернал бусаврийну, сценарий цIубакIрай мяйжаннугу ва ишираха лавхьхьусса бивкIун бур, цалнияр цал баххана буллай, аьмсса тагьарданийн буцлай, цIана кинофильм ласласисса журалийн бувцуну бур.
Кино ласлай байбишин хьхьичI режиссер ва сценарист Сириянавунгу бивну бур, ти­ккусса бунияласса тагьарданущалгу кIул хьуну бур.

Ва фильмраву буттал роль дургьуну ур Геза Морчани тIисса венгернал актер, душнил роль дургьуну бур Санкт-Петербурграясса жагьилсса актриса Екатерина Крамаренко.
Жулла республикалия махъ фильмрал съемкартту чан-кьан­сса хIаллай нантIиссар Туркнаву ва Сириянавугу.
Душнил ва буттал къабигьасса кьадарданиясса ва кинофильм жула билаятрай ккаккан дантIиссар 2019 шинал.

Залму АьбдурахIманова