[dropcap]Д[/dropcap]екабрьданул 13-нний жула билаятрал шагьрурдай ва шяраваллаву хьунни Театрданул шин тIитIаврин хас дур­сса личIи-личIисса шадлугъру, батIавуртту. МахIачкъалалив Оьруснал театрданул хъунмур залданувугу хьунни ва иширан хас дурсса шадлугърайсса батIаву.

Бадрижамал Аьлиева
[dropcap]В[/dropcap]идеообращениялийну залданувун бавтIми цинявппагу барча бунни АьФ-лул культуралул министр Владимир Мединскийл. Мунал цала ихтилатраву чIурчIав дунни махъсса ппур­ттуву жулва билаятрай театрдал даву хьхьичIуннай даврих хъуннасса къулагъас дуллай бушиву, цIа дурксса коллективирттах бакъа, билаятрал регионнай­сса, муниципалитетир­ттайсса коллективирттахгу. КIицI лавгунни билаятрал бакI дургьуми хIарачат буллай бушиву багьайсса ургъил буван театрдал гастроллалмур даврихгу, цIу-цIусса проектирдахгу.
Видеолийну циняв барча бунни РСФСР-данул халкьуннал артист, АьФ-лул Театрал ишккаккултрал союзрал председатель Александр Калягиннулгу.

[dropcap]В[/dropcap]а кьини залданувун бавтIсса культуралул ва искусствалул зузалт, театр ххирами Дагъус­ттан Республикалул каялувшиндарал чулуха барча бунни ДР-лул ХIукуматрал председательнал хъиривчу Рамазан Жяъпаровлул.
— Театрданул шин тамашачитуран байран духьурча, театрдануву зузиминнан му салкьи хьусса масъалартту ххал бигьинсса, щаллу бувансса чаранни. ЧIявуми театрду бур ремонтру дуванну, кьай-кьуй даххана дуванну, биял хъанай бакъар пишакарсса жагьилсса зузалт.

Умуд бур Театрданул шинал яла цIурувкьюми масъалартту щаллу хьунссар тIисса. Театрданул шинал дуван дакIнийсса давур­тту чIяруссар. Тамашачитурахь тIурча, ялугьлай дуссар ххаллилсса шадлугъру, цалгу жулла республикалул культуралул оьр­му чIюлу бувантIисса.
Барча буллай ура циняв­ппагу Театрданул шинащал! ЧIа тIий ура театрдал ко­л­лек­тивирттан цIу-цIусса хьхьи­чIуннайшивуртту, тамашачитуран – цIу-цIусса ярг-яргсса асарду! – увкуна ванал.

Муния махъ Оьруснал театрданул ккаккан бунни «Смеется ли Чехов» тIисса спектакль.
Республикалул гьарцагу театрданул, миннувух муниципалитетирттайсса халкьунналми театрдалгу, ккаккан бунни личIи-личIисса пьесарду, ва хьунни мяйжаннугусса Театрданул хьхьу.