ТIайлабацIусса хьуннав Театрданул шин

[dropcap]Я[/dropcap]лун нанисса шин жула билаятрай баян бувну бур Театрданул шинну.  Мунил сиптачину хьуну ур Театрал ишккаккултрал союзрал хъунама Александр Калягин

[dropcap]Т[/dropcap]IиртIунни театрданул шин ларгсса хамискьини, декабрь зурул 13-нний. Агьамми шадлугъру хьунни Ярославль шагьрулий Федор Волковлул цIанийсса цалчинсса оьруснал профессионал театрдануву.
Театр тIивтIуну бур 1750 шинал.
Микку билаятрал Президент Владимир Путиннул кIицI лавгунни хIакьину Аьрасатнавуксса чIявусса паччахIлугърал театрду дунияллул цамур билаятрай бакъашиву, Аьрасатнаву кунна театрал магьирлугъ хьхьичIунну цамур билаятрай дакъашиву. Умуд бивхьунни Театрданул шинал театрду хьхьичIунмай бансса чIярусса агьамсса давуртту дан бюхъантIишиврийн.

[dropcap]Т[/dropcap]еатрданул шин тIитIла­тIисса кьини дан ккаккан дурсса цинярда давуртту чулийн дуккан дурунни Апанни Къапиевлул цIанийсса Лакрал паччахIлугърал музыкалул ва драмалул театрданулгу.
КIюрххила театрданул каялувчи Бадрижат МахIаммад­хIажиева, директор МахIаммад ХIусайнов, хъунама режиссер Аслан МахIаммадов ва цаппарасса актертал лавгунни МахIач­къалаливсса хIатталлийн, жуява лавгсса актертал дакIнийн бичин.

Муния махъ театрданул ца­ппарасса зузалт лавгунни МахIач­къала шагьрулул 7-мур школа-гимназиялийн дуклаки оьрчIащал Театрданул шинан хас бувсса шарду итабакьин. Театрданул директор МахIаммад ХIусайновлул ва хъунама режи­ссер Аслан МахIаммадовлул бувсунни театрданул тарихрая ва хIакьинусса кьинилия. Дуклаки оьрчIру ххарину суратру ришлай бия жагьилсса актертуращал.

Театрданул шин тIиртIунни палангнал драматург Ж. Б. Мольердул «Кьякьлухун ивхьусса лас» тIисса къямадиялийну.
Спектакль байбишин хьхьичI театрданул завлит, Аьрасатнал Магьирлугърал лайкь хьу­сса ишккакку Гулизар Султановал бувсунни театрданул тарихрая, цалчинсса спектакллая, хIакьину жущалва бакъасса хьхьичIунсса актертурая, театр­данул хьхьичIуннайшивурттая ва репертуардания.
Тамашачитурал биялсса хIаз лавсунни къямадиялуя.
ЧIявусса агьамсса проектру чулийн буккан бан ниятрай бур Театрданул шинал Лакрал театр. ТIайлабацIу баннав!