Дарбант шагьрулий гала-концертрайну щаллу хьунни миллатирттал культурардал ва искусствалул Щаллагу Дунияллул «WORLD FOLK.VISION» фестиваль-конкурсрал региондалулмур этап.
Бадрижамал Аьлиева
Дарбант шагьрулул ОьрчIал ва чIава жагьилтурал творчествалул дворецрал сахIналийн ва кьини бувккунни жулла республикалул районнаясса ва шагьрурдаясса творчествалул коллективру, ккаккан бунни цавувасса личIи-личIисса гьунарду: балай учаврил, къавтIун бизаврил, шеъри буккаврил, музыкалул инструментру бищаврил, актершиврул.
[dropcap]Ф[/dropcap]естиваль-конкурсрал региондалулмур турданул жюрилуву бия искусствалул аралуву бусрав-сий дусса пишакартал, жулла республикалул бусравсса хъамал: дунияллийх цIа ларгсса хореограф Эльвира Таха, Владимирдал паччахIлугърал университетрал эстрадалул музыкалул искусствалул кафедралул хъунмур, эстрадалул вокалистурансса методикалул пособиярттал автор Лариса Семина, «WORLD FOLK.VISION» фестиваль-конкурсрал Ухссавнил Ккавкказуллал федерал округрайсса региондалулмур направлениялул каялувчи, «Модалул театр» направлениялул эксперт Индира Бадияр, Евразиянал экономикалул уртакьшиврул организациялул культуралул ва гуманитар уртакьшиврул Евразиянал комиссар Жанна Барсегова, «WORLD FOLK.VISION» фестиваль-конкурсрал СКФО-райсса каялувчи Разита Мушидова.
Ссятурдий най диркIсса язи бугьлагьимур тур къуртал хьуну махъ, му турданул лауреатътурал гьурттушиврийнусса гала-концерт хьунни. Жанна Барсеговал барчаллагь увкунни фестиваль-конкурсрай гьуртту хьуминнахь, спонсоршиврул кумаг бувминнахь.
Гьарцагу гьурттучинан буллунни дипломру, язиминнан тIурча – 1-мур, 2-мур, 3-мур даражарттал дипломру.
Фестиваль-конкурсрал региондалулмур этапрай ххув хьуминнал цIарду дуккиннин Жанна Барсеговал баян бувунни Евразиянал комиссар хIисаврай цуппа оьвтIий бушиву Саоьдуллал Аьрабусттаннай хьунтIисса Щаллагу Дунияллул финалданий гьуртту хьун цIа дурксса пагьламанчи, 1-мур ЦIувкIуллал шяравасса Расул Абакаровлуйн.
[dropcap]Ф[/dropcap]естиваль-конкурсрал региондалулмур этапрал Гран-приран «Народный вокал» номинациялий лайкь хьуну, Аьрабусттаннайнсса аьрххилийн хIадур хъанансса бахтти хьунни Лаващиял шяравасса МахIаммад ХIажиевлун, оьргърал усттартурал магьиршиву ккаккан дурсса, Кубачи шяравасса Бахтияр АьвдурахIмановлун. Дарбант шагьрулиясса ансамбль «Гюнеш» тIурча, гьуртту хьунтIиссар конкурс-фестивальданул Сочи шагьрулий хьунтIисса Щалагу Аьрасатналмур этапрай.
Саоьдуллал Аьрабусттаннай Щаллагу Дунияллул фестиваль-конкурс хьунтIиссар 2019 шинал февральданул 24-нния мартрал 5-ннийн дияннин.
