НицI

КIулну бур нукIузаманнуя шинмай ницI ккалли дайшиву ца яла хайр бумур дукиялун.

Уттисса ххал бигьавурттал ккаккан буллай бур ницI сакин хьуну душиву щиная (16-21%), нацIушиврия 75%. НацIушиврувун бухлахиссар глюкоза, фруктоза, сахароза, мальтоза ва м.ц. Дирсса ницI инсаннал организмалуву ччяни лялияйсса дур, мунияту 100 гр. ницIал чурххан булайсса бур 335 ккал. Ялагу ницI сакин хьуну дусса дур белокрая (0,04-030%, органический ва неорганический кислотIардая (0,43%).

НицIаву мукунма бусса бур кальций, натрий, магний, железо, сера, хлор, фосфор. Вай гьарзат инсаннал чурххан хъинну аьркинсса затрур. Масалдаран, кальций чара бакъа аьркинссар ттурчIан, железо оьттун. Мукунна ницIаву дусса дур цинярдагу микроэлементру: алюминий, бор, железо, йод, магний, нат­рий, сера, цинк. НицIаву бур В1, В2, В3, В6, В9, С (витаминнугу, атеросклероз хьун къаритай­сса ва цаймигу чIярусса, инсаннал чурххан хайр бусса затру.

Ххуйсса, дирсса ницI ядан шайссар шиннардий. Мунил буслай бур миву я микробру къашайшиву, ягу мяххи къадакьайшиву.
Мунияту нукIузаманнул мисриллал халкьуннал ва грекнал халкьуннал ницI ишла дайсса диркIун дур инсаннал жаназар­тту ядуллан . Яла махъ авадан­сса румуллал халкьуннал ссупралийгу дихьлан бивкIун бур личIи-личIисса аврдал дикIру, ялун ницIгу дуртIуну. Ва кьяйдалий, цуксса ххуллу битарчангу, дикI ххуйну яшайсса диркIун дур.
НицI ххуйну яшайсса дур кьавкьсса, ххуйну гьава бухлахи­сса, 5-10 градус дусса къатлуву. Амма ххал бигьавурттал буслай бур хъатру дусса къатлуву ницI ядан къабучIишиву, гай кьурчIи лагайшиву, кIу дайшиву.

НицI лахъи лаглагиссаксса хIисав шай кIира къат: лувмур къат кьянкьа ларгсса, ялувмур къат хьюмусса.
НицI ядан яла ххуймур тIахI­ни — пюрундалул тара дур. ЧIя­русса ницI ядан яла ххуймур тIахIни алюминдарал флягардугу ва тIаннул кьаллугу бур. Шалданул ницI (сотовый мед) ядангу 60% дирсса хъатру дусса къатри аьркинссар. НицI дусса къатлуву къабучIиссар нувщи, чимус, калан, балугъ м.ц. кьанкь дусса продукты дитан. Зия шайссар ницI гьавалул температура лагь-лахъ хъанахъинигу.

ХIадур бувссар
Т. ХIажиевал