Дагъусттаннал Росгвардиялул управлениялул зузалт ва аьралитал гьуртту хьунни КIул акъасса саллатIнал кьинилун хасну МахIачкъалалив Лениннул комсомолданул паркраву хьу­сса мероприятиярттай.

[dropcap]М[/dropcap]унил сакиншинначиталну хьунни «Волонтеры Победы» тIисса Щалагу Аьрасатнал жяматийсса суккушиндарал региондалул отделение ва МахIачкъала шагьрулул Советский райондалул администрация. Митинграй гьуртту хьунни ветерантал, Да­гъусттаннал Виваллил иширттал министерствалул ва УФСИН-лул зузалт, ТОКС-рал вакилтал, дуклаки оьрчIру, студентътал.
Ватан дуручлай жанну дуллуминнал аьпалун минутIрайсса пахъ багьаву дурну махъ, ихтилат бунни Дагъусттаннал Ветерантурал советрал председатель МахIарам Аьлид­жановлул.

— Буттал кIанттул цIанийсса Хъунмасса дяъви байбивхьусса чIумал Ватан дуручлай бивкIссар 120-нния ливчусса дагъусттанлувтал, 90 азара зана къавхьуссар. ЧIявусса буссар хIакьинусса кьинигу ятIа-тIар бакъасса. Минная кIул буллай, хъирив лаллалисса инсантурал хIарачатрайну гьарца шинах ттуршвахъул дагъусттанлувтурал цIарду лахъан дуллалиссар Аьпалул луттирайн. Хъунмасса Буттал кIанттул цIанийсса дяъвилул ветерантурал цIания на барчаллагь тIий ура ва бусравсса даву дуллалисса токсовцинахь, волонтертурахь, — увкунни ванал.
Дагъусттаннал Росгвардиялул управлениялул хъунаманал кумагчи, пресс-службалул хъунама Константин Шияннул барчаллагь увкунни бюхттулсса ххувшаву ларсъсса ветерантурахь.

— Жунна кIулну дикIан аьркин­ссар гьарица виричунал цIа. Умуд бур волонтертурал ку­маг­рацIух жунма тава-тагу ми циняв кIул хьуншиврий ва халкьуннал дакIурдиву абадлий личIаншиврий, — увкунни Константин Шияннул.
Хъирив ихтилат бунни МахIач­къалаллал Советский райондалул администрациялул хъунаманал хъиривчу Заур Амираьлиевлул. Ленинкент поселокрай­сса 35-мур гимназиялул ТОКС-равуминнал дурккунни Ватан дуручлай бивкIсса вирттавран хас дурсса назмурду. Ахирданий цинявннал тIутIив дирхьунни Аьраличунал гьайкалданучIа.